wo waqiat kise yaad ek zamana hua

vo vāqi.āt kise yaad ik zamāna huā

kisī ne kyā na kiyā aur ham pe kyā na huā

mirā burā to mire hasb-e-mudda.ā na huā

bhalā huā bhī to koī mirā burā na huā

dikhāte ham dil-e-pur-dāġh kī bahār use

ye manzar aur zarā sā bhī ḳhushnumā na huā

kisī kā dard-e-mohabbat agar thā kam-māya

to Thahar Thahar ke phir kyuuñ zarā zarā na huā

tirā irāda mubārak tujhe magar ai dil

ye naqsh-e-pā agar us kā hī naqsh-e-pā na huā

sitam kare bhī to samjhūñ ki ye sitam hī nahīñ

ḳhafā huā bhī to jānoñ ki tū ḳhafā na huā

kyā jab aane kā iqrār aap bhuul ga.e

ye ek va.ada to shāyad kabhī vafā na huā

zamāna aap ko āshiq-navāz kahtā hai

ye sach bhī ho to kabhī ham ko kuchh atā na huā

vo kyā kaheñge jo iqbāl hī na ho mujh ko

vo kyā kareñge jo maiñ qābil-e-ḳhatā na huā

agarche shaiḳh meñ lākhoñ karāmateñ aa.iiñ

magar ye bande kā banda rahā ḳhudā na huā

razā-e-dost ke hote haiñ aur kyā ma.anī

ki mujh se un kā kabhī aaj tak gilā na huā

vo ḳhud mile to batā kyā javāb duuñ ai dil

ye uzr lañg hai koī bhī rahnumā na huā

safī' nasīb bure hoñ to kyā kare koī

nahīñ to qais bhī kuchh aadmī burā na huā

wo waqiat kise yaad ek zamana hua

kisi ne kya na kiya aur hum pe kya na hua

mera bura to mere hasb-e-muddaa na hua

bhala hua bhi to koi mera bura na hua

dikhate hum dil-e-pur-dagh ki bahaar use

ye manzar aur zara sa bhi KHushnuma na hua

kisi ka dard-e-mohabbat agar tha kam-maya

to Thahar Thahar ke phir kyun zara zara na hua

tera irada mubarak tujhe magar ai dil

ye naqsh-e-pa agar us ka hi naqsh-e-pa na hua

sitam kare bhi to samjhun ki ye sitam hi nahin

KHafa hua bhi to jaanon ki tu KHafa na hua

kya jab aane ka iqrar aap bhul gae

ye ek wada to shayad kabhi wafa na hua

zamana aap ko aashiq-nawaz kahta hai

ye sach bhi ho to kabhi hum ko kuchh ata na hua

wo kya kahenge jo iqbaal hi na ho mujh ko

wo kya karenge jo main qabil-e-KHata na hua

agarche shaiKH mein lakhon karamaten aain

magar ye bande ka banda raha KHuda na hua

raza-e-dost ke hote hain aur kya mani

ki mujh se un ka kabhi aaj tak gila na hua

wo KHud mile to bata kya jawab dun ai dil

ye uzr lang hai koi bhi rahnuma na hua

safi' nasib bure hon to kya kare koi

nahin to qais bhi kuchh aadmi bura na hua