wo wafa ko jafa samajhte hain

vo vafā ko jafā samajhte haiñ

ham jafā ko vafā samajhte haiñ

kyā batā.eñ vo kyā samajhte haiñ

ḳhud ko shāyad ḳhudā samajhte haiñ

ai buto tum ko kyā samajhte haiñ

jo ḳhudā ko ḳhudā samajhte haiñ

kyā kaheñ tum ko kyā samajhte haiñ

banda-parvar ḳhudā samajhte haiñ

apnī ḳhalvat meñ daḳhl deñ kyūñkar

vo mirā mudda.ā samajhte haiñ

kyoñ hoñ mamnūn hazrat-e-īsā

dard ko jo davā samajhte haiñ

jin ko duniyā meñ kuchh nahiñ aatā

ab unheñ peshvā samajhte haiñ

āh-o-fariyād-o-nāla-o-shevan

āshiqī kī sazā samajhte haiñ

jaur-e-gardūñ ko sach agar pūchho

aap kī ik adā samajhte haiñ

mai-kade meñ ilaaj hai us kā

sab jise lā-davā samajhte haiñ

badtarīn-e-gunāh duniyā meñ

ham to kibr-o-riyā samajhte haiñ

aise ḳhush-fahm bhī haiñ duniyā meñ

shaiḳh ko pārsā samajhte haiñ

rind pīr-e-muġhāñ ko ai 'shāġhil'

mai-kade kā ḳhudā samajhte haiñ

wo wafa ko jafa samajhte hain

hum jafa ko wafa samajhte hain

kya bataen wo kya samajhte hain

KHud ko shayad KHuda samajhte hain

ai buto tum ko kya samajhte hain

jo KHuda ko KHuda samajhte hain

kya kahen tum ko kya samajhte hain

banda-parwar KHuda samajhte hain

apni KHalwat mein daKHl den kyunkar

wo mera muddaa samajhte hain

kyon hon mamnun hazrat-e-isa

dard ko jo dawa samajhte hain

jin ko duniya mein kuchh nahin aata

ab unhen peshwa samajhte hain

aah-o-fariyaad-o-nala-o-shewan

aashiqi ki saza samajhte hain

jaur-e-gardun ko sach agar puchho

aap ki ek ada samajhte hain

mai-kade mein ilaj hai us ka

sab jise la-dawa samajhte hain

badtarin-e-gunah duniya mein

hum to kibr-o-riya samajhte hain

aise KHush-fahm bhi hain duniya mein

shaiKH ko parsa samajhte hain

rind pir-e-mughan ko ai 'shaghil'

mai-kade ka KHuda samajhte hain