wo ye kah kah ke jalata tha hamesha mujhko

vo ye kah kah ke jalātā thā hamesha mujh ko

aur DhūñDegā kahīñ mere alāva mujh ko

kis qadar us ko sarāboñ ne satāyā hogā

duur hī se jo samajhtā rahā chashma mujh ko

merī ummīd ke sūraj ko Dubo ke har shaam

vo dikhātā rahā dariyā kā tamāsha mujh ko

jab kisī raat kabhī baiTh ke mai-ḳhāne meñ

ḳhud ko bāñTegā to degā mirā hissa mujh ko

phir sajā degā vo yādoñ ke ajā.ib-ghar meñ

soch kar ahd-e-junūñ kā koī sikka mujh ko

mere ehsās ke dozaḳh meñ sulagne ke liye

chhoḌ degā mire ḳhvāboñ kā farishta mujh ko

phir ye hogā ki kisī din kahīñ kho jā.egā

ik dorāhe pe biThā ke mirā rasta mujh ko

log kahte haiñ ki jaadū kī saḌak hai maazī

muḌ ke dekhūñgī to ho jā.egā sakta mujh ko

sabz mausam kī ināyat kā bharosā bhī nahīñ

kab uḌā de ye havā jaan ke pattā mujh ko

vaqt hākim hai kisī roz dilā hī degā

dil ke sailāb-zada shahr pe qabza mujh ko

maiñ na lailā huuñ na rakhtā hai vo majnūñ kā mizāj

us ne chāhā hai magar mere alāva mujh ko

wo ye kah kah ke jalata tha hamesha mujh ko

aur DhunDega kahin mere alawa mujh ko

kis qadar us ko sarabon ne sataya hoga

dur hi se jo samajhta raha chashma mujh ko

meri ummid ke suraj ko Dubo ke har sham

wo dikhata raha dariya ka tamasha mujh ko

jab kisi raat kabhi baiTh ke mai-KHane mein

KHud ko banTega to dega mera hissa mujh ko

phir saja dega wo yaadon ke ajaib-ghar mein

soch kar ahd-e-junun ka koi sikka mujh ko

mere ehsas ke dozaKH mein sulagne ke liye

chhoD dega mere KHwabon ka farishta mujh ko

phir ye hoga ki kisi din kahin kho jaega

ek dorahe pe biTha ke mera rasta mujh ko

log kahte hain ki jadu ki saDak hai mazi

muD ke dekhungi to ho jaega sakta mujh ko

sabz mausam ki inayat ka bharosa bhi nahin

kab uDa de ye hawa jaan ke patta mujh ko

waqt hakim hai kisi roz dila hi dega

dil ke sailab-zada shahr pe qabza mujh ko

main na laila hun na rakhta hai wo majnun ka mizaj

us ne chaha hai magar mere alawa mujh ko