wufur-e-shauq ki rangin hikayaten mat puchh

vufūr-e-shauq kī rañgīñ hikāyateñ mat pūchh

laboñ kā pyaar nigah kī shikāyateñ mat pūchh

kisī nigāh kī nas nas meñ tairte nishtar

vo ibtidā-e-mohabbat kī rāhateñ mat pūchh

vo nīm-shab vo javāñ husn vo vufūr-e-niyāz

nigāh o dil ne jo kī haiñ ibādateñ mat pūchh

hujūm-e-ġham meñ bhī jiinā sikhā diyā ham ko

ġham-e-jahāñ kī haiñ kyā kyā ināyateñ mat pūchh

ye sirf ek qayāmat hai chain kī karvaT

dabī haiñ dil meñ hazāroñ qayāmateñ mat pūchh

bas ek harf-e-baġhāvat zabāñ se niklā thā

shahīd ho ga.iiñ kitnī rivāyateñ mat pūchh

ab aaj qissa-e-dārā-o-jam kā kyā hogā

hamāre paas haiñ apnī hikāyateñ mat pūchh

nishān-e-hiTlari-o-qaisarī nahīñ miltā

jo ibratoñ ne likhī haiñ ibārateñ mat pūchh

nashāt-e-zīst faqat ahl-e-ġham kī hai mīrās

mileñgī aur abhī kitnī daulateñ mat pūchh

wufur-e-shauq ki rangin hikayaten mat puchh

labon ka pyar nigah ki shikayaten mat puchh

kisi nigah ki nas nas mein tairte nishtar

wo ibtida-e-mohabbat ki rahaten mat puchh

wo nim-shab wo jawan husn wo wufur-e-niyaz

nigah o dil ne jo ki hain ibaadaten mat puchh

hujum-e-gham mein bhi jina sikha diya hum ko

gham-e-jahan ki hain kya kya inayaten mat puchh

ye sirf ek qayamat hai chain ki karwaT

dabi hain dil mein hazaron qayamaten mat puchh

bas ek harf-e-baghawat zaban se nikla tha

shahid ho gain kitni riwayaten mat puchh

ab aaj qissa-e-dara-o-jam ka kya hoga

hamare pas hain apni hikayaten mat puchh

nishan-e-hiTlari-o-qaisari nahin milta

jo ibraton ne likhi hain ibaraten mat puchh

nashat-e-zist faqat ahl-e-gham ki hai miras

milengi aur abhi kitni daulaten mat puchh