wusat-e-kaun-o-makan mein wo samate bhi nahin

vus.at-e-kaun-o-makāñ meñ vo samāte bhī nahīñ

jalva-afroz bhī haiñ sāmne aate bhī nahīñ

pārsā.ī kā hamārī nahīñ duniyā meñ javāb

vaqt aa jaa.e to dāman ko bachāte bhī nahīñ

ham vo mai-kash haiñ kī saaqī kī nazar phirte hī

jaam kī samt nigāhoñ ko uThāte bhī nahīñ

ḳhud hī rañg-e-ruḳh-e-mahbūb uḌā jaatā hai

ham to rūdād-e-ġham-e-ishq sunāte bhī nahīñ

bū-e-gul jin kā kiyā kartī thī rah rah ke tavāf

ab chaman meñ vo nasheman nazar aate bhī nahīñ

ham vo barbād-e-mohabbat haiñ ḳhudā shāhid hai

aag dil meñ jo lagī ho to bujhāte bhī nahīñ

vaqt nāzuk hai ye kyā soch rahe ho 'shā.ir'

aisī zulmat meñ koī sham.a jalāte bhī nahīñ

wusat-e-kaun-o-makan mein wo samate bhi nahin

jalwa-afroz bhi hain samne aate bhi nahin

parsai ka hamari nahin duniya mein jawab

waqt aa jae to daman ko bachate bhi nahin

hum wo mai-kash hain ki saqi ki nazar phirte hi

jam ki samt nigahon ko uThate bhi nahin

KHud hi rang-e-ruKH-e-mahbub uDa jata hai

hum to rudad-e-gham-e-ishq sunate bhi nahin

bu-e-gul jin ka kiya karti thi rah rah ke tawaf

ab chaman mein wo nasheman nazar aate bhi nahin

hum wo barbaad-e-mohabbat hain KHuda shahid hai

aag dil mein jo lagi ho to bujhate bhi nahin

waqt nazuk hai ye kya soch rahe ho 'shair'

aisi zulmat mein koi shama jalate bhi nahin