wusat hai wahi tangi-e-aflak wahi hai

vus.at hai vahī tañgi-e-aflāk vahī hai

jo ḳhaak pe zāhir hai pas-e-ḳhāk vahī hai

ik umr huī mausam-e-zindāñ nahīñ badlā

rauzan hai vahī dīda-e-namnāk vahī hai

kyā chashm-e-rafū-gar se shikāyat ho ki ab tak

vahshat hai vahī sīna-e-sad-chāk vahī hai

har chand ki hālāt muāfiq nahīñ phir bhī

dil terī taraf-dārī meñ saffāk vahī hai

ik haath kī jumbish meñ dar-o-bast hai varna

gardish vahī kuuza hai vahī chaak vahī hai

jo kuchh hai mire paas vo merā nahīñ shāyad

jo maiñ ne gañvā dī mirī imlāk vahī hai

zoroñ pe 'salīm' ab ke hai nafrat kā bahāv

jo bach ke nikal aa.egā tairāk vahī hai

wusat hai wahi tangi-e-aflak wahi hai

jo KHak pe zahir hai pas-e-KHak wahi hai

ek umr hui mausam-e-zindan nahin badla

rauzan hai wahi dida-e-namnak wahi hai

kya chashm-e-rafu-gar se shikayat ho ki ab tak

wahshat hai wahi sina-e-sad-chaak wahi hai

har chand ki haalat muafiq nahin phir bhi

dil teri taraf-dari mein saffak wahi hai

ek hath ki jumbish mein dar-o-bast hai warna

gardish wahi kuza hai wahi chaak wahi hai

jo kuchh hai mere pas wo mera nahin shayad

jo main ne ganwa di meri imlak wahi hai

zoron pe 'salim' ab ke hai nafrat ka bahaw

jo bach ke nikal aaega tairak wahi hai