ya-rab kahan gaya hai wo sarw-e-shoKH-rana

yā-rab kahāñ gayā hai vo sarv-e-shoḳh-ra.anā

hai chob-e-ḳhushk jis bin merī nazar meñ tuubā

dīdār de shitābī jalne kī taab niiñ hai

is hijr kī agan siiñ dozaḳh kī aag aulā

tauq-e-gulū-e-dil hai zulf-e-sanam kā har ḳham

mash.hūr ye masal hai yak sar hazār saudā

hai ḳhatm yār-e-jānī tere dahan kī tañgī

kahne kī baat niiñ hai bārīk hai muammā

ai gul-badan nazar kar dāġh-e-jigar kuuñ mere

gar aarzū hai tujh kuuñ gulzār kā tamāshā

maskan huā hai merā jab siiñ tirī galī meñ

ai gul-ezār tab siiñ jannat kī niiñ tamannā

hai ai 'sirāj' har shab mahtāb-rū ke ġham meñ

aañsū kā mere jhamkā jyuuñ ḳhosha-e-surayyā

ya-rab kahan gaya hai wo sarw-e-shoKH-rana

hai chob-e-KHushk jis bin meri nazar mein tuba

didar de shitabi jalne ki tab nin hai

is hijr ki agan sin dozaKH ki aag aula

tauq-e-gulu-e-dil hai zulf-e-sanam ka har KHam

mashhur ye masal hai yak sar hazar sauda

hai KHatm yar-e-jaani tere dahan ki tangi

kahne ki baat nin hai barik hai muamma

ai gul-badan nazar kar dagh-e-jigar kun mere

gar aarzu hai tujh kun gulzar ka tamasha

maskan hua hai mera jab sin teri gali mein

ai gul-ezar tab sin jannat ki nin tamanna

hai ai 'siraj' har shab mahtab-ru ke gham mein

aansu ka mere jhamka jyun KHosha-e-surayya