yaad aaen jo ayyam-e-bahaaran to kidhar jaen

yaad aa.eñ jo ayyām-e-bahārāñ to kidhar jaa.eñ

ye to koī chāra nahīñ sar phoḌ ke mar jaa.eñ

qadmoñ ke nishāñ haiñ na koī miil kā patthar

is raah se ab jin ko guzarnā hai guzar jaa.eñ

rasmeñ hī badal dī haiñ zamāne ne diloñ kī

kis vaz.a se us bazm meñ ai dīda-e-tar jaa.eñ

jaañ dene ke daave hoñ ki paimān-e-vafā ho

jī meñ to ye aatā hai ki ab ham bhī mukar jaa.eñ

har mauj gale lag ke ye kahtī hai Thahar jaao

dariyā kā ishāra hai ki ham paar utar jaa.eñ

shīshe se bhī nāzuk haiñ inheñ chhū ke na dekho

aisā na ho āñkhoñ ke hasīñ ḳhvāb bikhar jaa.eñ

tārīk hue jaate haiñ baḌhte hue saa.e

'aḳhtar' se kaho shaam huī aap bhī ghar jaa.eñ

yaad aaen jo ayyam-e-bahaaran to kidhar jaen

ye to koi chaara nahin sar phoD ke mar jaen

qadmon ke nishan hain na koi mil ka patthar

is rah se ab jin ko guzarna hai guzar jaen

rasmen hi badal di hain zamane ne dilon ki

kis waza se us bazm mein ai dida-e-tar jaen

jaan dene ke dawe hon ki paiman-e-wafa ho

ji mein to ye aata hai ki ab hum bhi mukar jaen

har mauj gale lag ke ye kahti hai Thahar jao

dariya ka ishaara hai ki hum par utar jaen

shishe se bhi nazuk hain inhen chhu ke na dekho

aisa na ho aankhon ke hasin KHwab bikhar jaen

tarik hue jate hain baDhte hue sae

'aKHtar' se kaho sham hui aap bhi ghar jaen