yaad-e-KHuda se aaya na iman kisi tarah

yād-e-ḳhudā se aayā na īmāñ kisī tarah

kāfir bane na ham na musalmāñ kisī tarah

karte ho va.ada aane kā hai aañkh muntazar

kab tak guzāre din ye hai mehmāñ kisī tarah

āzād ishq-e-yār ne ham ko banā diyā

māl-o-matā' kā huuñ na maiñ ḳhvāhāñ kisī tarah

piite raho sharāb jahāñ tak ki ho sake

shāġhil na chhūTe saaqī kā dāmāñ kisī tarah

aa jāveñ gar nasīb se aalam hai naza.a kā

nikle hamāre dil ke bhī armāñ kisī tarah

mar jā.ūñ un ke tīr-e-nigah se najāt ho

gardan pe mere un kā ho ehsāñ kisī tarah

zindāñ haiñ phañs gayā dil-e-muztar nigāh ke

baiThe haiñ pāsbāñ bane mizhgāñ kisī tarah

ba.ad-e-fanā bhī qabr ko mismār kar diyā

iz.hār-e-rañj kā na ho sāmāñ kisī tarah

advār meñ agarche hai 'markaz' ghirā huā

chhoḌe na tujh ko rahmat sub.hāñ kisī tarah

yaad-e-KHuda se aaya na iman kisi tarah

kafir bane na hum na musalman kisi tarah

karte ho wada aane ka hai aankh muntazar

kab tak guzare din ye hai mehman kisi tarah

aazad ishq-e-yar ne hum ko bana diya

mal-o-mata' ka hun na main KHwahan kisi tarah

pite raho sharab jahan tak ki ho sake

shaghil na chhuTe saqi ka daman kisi tarah

aa jawen gar nasib se aalam hai naza ka

nikle hamare dil ke bhi arman kisi tarah

mar jaun un ke tir-e-nigah se najat ho

gardan pe mere un ka ho ehsan kisi tarah

zindan hain phans gaya dil-e-muztar nigah ke

baiThe hain pasban bane mizhgan kisi tarah

baad-e-fana bhi qabr ko mismar kar diya

izhaar-e-ranj ka na ho saman kisi tarah

adwar mein agarche hai 'markaz' ghira hua

chhoDe na tujh ko rahmat subhan kisi tarah