yaad hai pahle-pahal ki wo mulaqat ki baat

yaad hai pahle-pahal kī vo mulāqāt kī baat

vo maze din ke na bhūle haiñ na vo raat kī baat

kabhī masjid meñ jo vaa.iz kā bayāñ suntā huuñ

yaad aatī hai mujhe pīr-e-ḳharābāt kī baat

yaad piirī meñ kahāñ ab vo javānī kī tarañg

sub.h hote hī hameñ bhuul ga.ī raat kī baat

shaiḳh jī majma-e-zindāñ meñ nasīhat kaisī

kaun suntā hai yahāñ qibla-e-hājāt kī baat

haa.e phir chheḌ diyā zikr adū kā tum ne

phir nikālī na vahī tark-e-mulāqāt kī baat

jab liyā ahd shab-e-vasl kahā is ne 'hafīz'

sub.h ko yaad rahegī ye hameñ raat kī baat

yaad hai pahle-pahal ki wo mulaqat ki baat

wo maze din ke na bhule hain na wo raat ki baat

kabhi masjid mein jo waiz ka bayan sunta hun

yaad aati hai mujhe pir-e-KHarabaat ki baat

yaad piri mein kahan ab wo jawani ki tarang

subh hote hi hamein bhul gai raat ki baat

shaiKH ji majma-e-zindan mein nasihat kaisi

kaun sunta hai yahan qibla-e-hajat ki baat

hae phir chheD diya zikr adu ka tum ne

phir nikali na wahi tark-e-mulaqat ki baat

jab liya ahd shab-e-wasl kaha is ne 'hafiz'

subh ko yaad rahegi ye hamein raat ki baat