yaad ke shahr meri jaan se guzar

yaad ke shahr mirī jaañ se guzar

qurb ke āḳhirī imkāñ se guzar

jal bujhī thī maiñ tire khilne tak

ab mirī ḳhāk-e-pareshāñ se guzar

aks bunñe lagā sahrā tere

mere sūraj ruḳh-e-tābāñ se guzar

zaḳhm gar mere ho kuchh aur atā

haañ abas nashtar o paikāñ se guzar

uTh chukīñ gul-suḳhanī kī rasmeñ

gosh-e-jāñ harf-e-bahārāñ se guzar

āḳhirī lau na bujhā jaa.e kahīñ

shab-e-jāñ meñ ruke mehmāñ se guzar

ai mire abr mirī miTTī kī

tishnagī par sar-e-mizhgāñ se guzar

aañkh ab tīrgī-e-ġham se bujhī

ashk-e-ḳhūñ jashn-e-charāġhāñ se guzar

yaad ke shahr meri jaan se guzar

qurb ke aaKHiri imkan se guzar

jal bujhi thi main tere khilne tak

ab meri KHak-e-pareshan se guzar

aks bunne laga sahra tere

mere suraj ruKH-e-taban se guzar

zaKHm gar mere ho kuchh aur ata

han abas nashtar o paikan se guzar

uTh chukin gul-suKHani ki rasmen

gosh-e-jaan harf-e-bahaaran se guzar

aaKHiri lau na bujha jae kahin

shab-e-jaan mein ruke mehman se guzar

ai mere abr meri miTTi ki

tishnagi par sar-e-mizhgan se guzar

aankh ab tirgi-e-gham se bujhi

ashk-e-KHun jashn-e-charaghan se guzar