yaad se teri faza-e-shab munawwar ho gai

yaad se terī fazā-e-shab munavvar ho ga.ī

terī ḳhushbū se mirī jaañ tak mo.attar ho ga.ī

ḳhūñ-bahā maazī kā denā ham pe vājib ho gayā

fasl ab teġh-o-tabar kī bhī muqarrar ho ga.ī

gardish-e-daurāñ se paspā ho nahīñ paayā magar

tere māthe kī shikan merā muqaddar ho ga.ī

vo nigāh-e-dil-rubā jis par ki ham ko naaz thā

dil ke shīshe ke liye kyoñ aaj patthar ho ga.ī

kaise samjhūñ ab girānī kā zamāna aa gayā

ḳhūn-e-insāñ kī to qīmat kam se kamtar ho ga.ī

zulm ke sho.ale bhaḌakte jā rahe haiñ har taraf

zindagī kyā hai hadīs-e-teġh-o-ḳhanjar ho ga.ī

maiñ hujūm-e-be-karāñ meñ kho chukī pahchān huuñ

āgahī apnī faqat ik dīda-e-tar ho ga.ī

tere aane se chaman meñ aa ga.ī phir se bahār

ḳhushk Tahnī bhī yahāñ ab to gul-e-tar ho ga.ī

vo bhī thī taḳhlīq ke sail-e-ravāñ kī ik tarang

rūh-e-insāñ kaise ġhamgīn-o-mukaddar ho ga.ī

dard ke rishte se duniyā mere dil meñ aa basī

ik zarā sī āb-jū baḌh kar samundar ho ga.ī

lauT kar tanhā.iyāñ kartī sukūñ tārāj hai

yaad terī merī ḳhātir ek lashkar ho ga.ī

is jabīñ par aa gayā arq-e-nadāmat kā guhar

Duub jā.ūñ buuñd vo aisā samundar ho ga.ī

yaad se teri faza-e-shab munawwar ho gai

teri KHushbu se meri jaan tak moattar ho gai

KHun-baha mazi ka dena hum pe wajib ho gaya

fasl ab tegh-o-tabar ki bhi muqarrar ho gai

gardish-e-dauran se paspa ho nahin paya magar

tere mathe ki shikan mera muqaddar ho gai

wo nigah-e-dil-ruba jis par ki hum ko naz tha

dil ke shishe ke liye kyon aaj patthar ho gai

kaise samjhun ab girani ka zamana aa gaya

KHun-e-insan ki to qimat kam se kamtar ho gai

zulm ke shoale bhaDakte ja rahe hain har taraf

zindagi kya hai hadis-e-tegh-o-KHanjar ho gai

main hujum-e-be-karan mein kho chuki pahchan hun

aagahi apni faqat ek dida-e-tar ho gai

tere aane se chaman mein aa gai phir se bahaar

KHushk Tahni bhi yahan ab to gul-e-tar ho gai

wo bhi thi taKHliq ke sail-e-rawan ki ek tarang

ruh-e-insan kaise ghamgin-o-mukaddar ho gai

dard ke rishte se duniya mere dil mein aa basi

ek zara si aab-ju baDh kar samundar ho gai

lauT kar tanhaiyan karti sukun taraj hai

yaad teri meri KHatir ek lashkar ho gai

is jabin par aa gaya arq-e-nadamat ka guhar

Dub jaun bund wo aisa samundar ho gai