hamare zaKHm-e-tamanna purane ho gae hain

hamāre zaḳhm-e-tamannā purāne ho ga.e haiñ

ki us galī meñ ga.e ab zamāne ho ga.e haiñ

tum apne chāhne vāloñ kī baat mat suniyo

tumhāre chāhne vaale divāne ho ga.e haiñ

vo zulf dhuup meñ furqat kī aa.ī hai jab yaad

to bādal aa.e haiñ aur shāmiyāne ho ga.e haiñ

jo apne taur se ham ne kabhī guzāre the

vo sub.h o shaam to jaise fasāne ho ga.e haiñ

ajab mahak thī mire gul tire shabistāñ kī

so bulbuloñ ke vahāñ āshiyāne ho ga.e haiñ

hamāre baa'd jo aa.eñ unheñ mubārak ho

jahāñ the kunj vahāñ kār-ḳhāne ho ga.e haiñ

hamare zaKHm-e-tamanna purane ho gae hain

ki us gali mein gae ab zamane ho gae hain

tum apne chahne walon ki baat mat suniyo

tumhaare chahne wale diwane ho gae hain

wo zulf dhup mein furqat ki aai hai jab yaad

to baadal aae hain aur shamiyane ho gae hain

jo apne taur se hum ne kabhi guzare the

wo subh o sham to jaise fasane ho gae hain

ajab mahak thi mere gul tere shabistan ki

so bulbulon ke wahan aashiyane ho gae hain

hamare ba'd jo aaen unhen mubarak ho

jahan the kunj wahan kar-KHane ho gae hain