yaad uski hai kuchh aisi ki bisarti bhi nahin

yaad us kī hai kuchh aisī ki bisartī bhī nahīñ

niiñd aatī bhī nahīñ raat guzartī bhī nahīñ

zindagī hai ki kisī tarah guzartī bhī nahīñ

aarzū hai ki mirī maut se Dartī bhī nahīñ

bas guzarte chale jaate haiñ mah-o-sāl-e-umīd

do-ghaḌī gardish-e-ayyām Thahartī bhī nahīñ

duur hai manzil-e-āfāq dukhī baiThe haiñ

saḳht hai paañv kī zanjīr utartī bhī nahīñ

sun to saa.il nahīñ ham ḳhāk-nashīn-e-gumrāh

ai sabā tū to zarā der Thahartī bhī nahīñ

shaam hotī hai to ik ajnabī dastak ke sivā

dil se pahroñ koī āvāz ubhartī bhī nahīñ

zindagī tū bhī koī mauj-e-balā kyuuñ na sahī

ek hī baar mire sar se guzartī bhī nahīñ

yaad us ki hai kuchh aisi ki bisarti bhi nahin

nind aati bhi nahin raat guzarti bhi nahin

zindagi hai ki kisi tarah guzarti bhi nahin

aarzu hai ki meri maut se Darti bhi nahin

bas guzarte chale jate hain mah-o-sal-e-umid

do-ghaDi gardish-e-ayyam Thaharti bhi nahin

dur hai manzil-e-afaq dukhi baiThe hain

saKHt hai panw ki zanjir utarti bhi nahin

sun to sail nahin hum KHak-nashin-e-gumrah

ai saba tu to zara der Thaharti bhi nahin

sham hoti hai to ek ajnabi dastak ke siwa

dil se pahron koi aawaz ubharti bhi nahin

zindagi tu bhi koi mauj-e-bala kyun na sahi

ek hi bar mere sar se guzarti bhi nahin