yaadon ke gul dil ke tu gul-dan mein rakh

yādoñ ke gul dil ke tū gul-dān meñ rakh

aaj bhī un kī sūrat apne dhyān meñ rakh

shahr-e-jafā meñ ab us ne bisrām kiyā

ḳhat us ke ab saare ātish-dān meñ rakh

duniyā ko sauġhāt ḳhushī kī baañT sadā

ġham poshīda apne qalb-o-jān meñ rakh

jaane dushman kis dam sāmne aa jaa.e

ġhāfil mat rah koī tiir kamān meñ rakh

ye tere aslāf kā baaqī virsa hai

is TuuTī talvār ko bhī sāmān meñ rakh

jis se dil-āzārī ho insānoñ kī

aisā koī sitam na apnī shaan meñ rakh

dukhiyāroñ ke dard kā ye bhī darmāñ hai

ġham-ḳhvāroñ ke chehroñ ko muskān meñ rakh

ho ke dil-bardashta rishte toḌ na sab

kuchh to jazbe dil kī bhī dūkān meñ rakh

jaane 'sā.ir' kab taqdīr badal jaa.e

apne har mohsin ko tū pahchān meñ rakh

yaadon ke gul dil ke tu gul-dan mein rakh

aaj bhi un ki surat apne dhyan mein rakh

shahr-e-jafa mein ab us ne bisram kiya

KHat us ke ab sare aatish-dan mein rakh

duniya ko saughat KHushi ki banT sada

gham poshida apne qalb-o-jaan mein rakh

jaane dushman kis dam samne aa jae

ghafil mat rah koi tir kaman mein rakh

ye tere aslaf ka baqi wirsa hai

is TuTi talwar ko bhi saman mein rakh

jis se dil-azari ho insanon ki

aisa koi sitam na apni shan mein rakh

dukhiyaron ke dard ka ye bhi darman hai

gham-KHwaron ke chehron ko muskan mein rakh

ho ke dil-bardashta rishte toD na sab

kuchh to jazbe dil ki bhi dukan mein rakh

jaane 'sair' kab taqdir badal jae

apne har mohsin ko tu pahchan mein rakh