yar hain chin-bar-jabin sab mehrban koi nahin

yaar haiñ chīñ-bar-jabīñ sab mehrbāñ koī nahīñ

ham se hañs kar bolne vaalā yahāñ koī nahīñ

qismat ik shab le ga.ī mujh ko jo bāġh-e-vasl meñ

dekhtā kyā huuñ ki us kā bāġhbāñ koī nahīñ

barq-e-gulshan meñ paḌī kis ke tabassum se sabā

jo na jhulsā hove aisā āshiyāñ koī nahīñ

vaa.e nākāmī ki fariyādī haiñ ham us shahr meñ

juz-ḳhamoshī dād-ras apnā jahāñ koī nahīñ

sub.h hote ḳhvāb-e-ġhaflat se jo chauñke ham to haa.e

aañkh ke khulte hī dekhā kārvāñ koī nahīñ

ai dil-e-be-jur.at itnī bhī na kar be-jur.atī

juz sabā us gul kā is dam pāsbāñ koī nahīñ

do ghaḌī mil baiTheñ ham tum ek dam jo chain se

haa.e zer-e-āsmāñ aisā makāñ koī nahīñ

maiñ jo pūchhūñ huuñ tire ghar meñ bhī aatā hai koī

yuuñ kahe hai pher kar muñh meñ zabāñ koī nahīñ

muñh uThā.e jaate haiñ yuuñ dasht-e-ġhurbat meñ chale

nā-balad haiñ sab hī ham meñ rāh-dāñ koī nahīñ

''Thahriyo Tuk Thahriyo'' kī aa.e hai āvāz sī

dekhiyo pīchhe to aaj ai ham-rahāñ koī nahīñ

ḳhvāb-gah se kyā uḌā kar le ga.ī us ko sabā

aur sab zevar hai us kā itr-dāñ koī nahīñ

'mus.hafī' kyā ḳhaak ham sher-o-suḳhan par jī lagā.eñ

shā.erī ye kuchh hai lekin qadr-dāñ koī nahīñ

yar hain chin-bar-jabin sab mehrban koi nahin

hum se hans kar bolne wala yahan koi nahin

qismat ek shab le gai mujh ko jo bagh-e-wasl mein

dekhta kya hun ki us ka baghban koi nahin

barq-e-gulshan mein paDi kis ke tabassum se saba

jo na jhulsa howe aisa aashiyan koi nahin

wae nakaami ki fariyaadi hain hum us shahr mein

juz-KHamoshi dad-ras apna jahan koi nahin

subh hote KHwab-e-ghaflat se jo chaunke hum to hae

aankh ke khulte hi dekha karwan koi nahin

ai dil-e-be-jurat itni bhi na kar be-jurati

juz saba us gul ka is dam pasban koi nahin

do ghaDi mil baiThen hum tum ek dam jo chain se

hae zer-e-asman aisa makan koi nahin

main jo puchhun hun tere ghar mein bhi aata hai koi

yun kahe hai pher kar munh mein zaban koi nahin

munh uThae jate hain yun dasht-e-ghurbat mein chale

na-balad hain sab hi hum mein rah-dan koi nahin

Thahriyo Tuk Thahriyo ki aae hai aawaz si

dekhiyo pichhe to aaj ai ham-rahan koi nahin

KHwab-gah se kya uDa kar le gai us ko saba

aur sab zewar hai us ka itr-dan koi nahin

'mushafi' kya KHak hum sher-o-suKHan par ji lagaen

shaeri ye kuchh hai lekin qadr-dan koi nahin