yar ke nargis-e-bimar ka bimar raha

yaar ke nargis-e-bīmār kā bīmār rahā

yahī āzār mire darpai-e-āzār rahā

umr-bhar shefta-e-chashm-o-lab-e-yār rahā

kabhī sūrat rahī mujh ko kabhī bīmār rahā

dil ko mere na zarā rañj shab-e-tār rahā

sham-e-afroz ḳhayāl-e-ruḳh-e-kaddār rahā

lab pe dil-soḳhtoñ ke naala sharar-bār rahā

sard-mehrī kā tire garm ye bāzār rahā

maiñ fidā ruḳh pe vo zulfoñ kā giraftār rahā

dil ko tujh se na mujhe dil se sarokār rahā

ḳhud-faroshī sar-e-bāzār jo laa.ī un ko

misr meñ ek na yūsuf kā ḳharīdār rahā

mere marne se phañsā dām-e-ġham-o-ranj meñ vo

maiñ rihā ho gayā sayyād giraftār rahā

but-parastī meñ bhī bhūlī na mujhe yād-e-ḳhudā

haath meñ sub.ha gale meñ mire zunnār rahā

laakh asīroñ ko kiyā tum ne rihā zindāñ se

ek mahrūm-e-ināyat ye gunahgār rahā

terī ai vahshat-e-dil dast-darāzī na ga.ī

ba.ad-e-murdan bhī kafan meñ na koī taar rahā

rauzan-e-qabr se jhāñke jo vo iisā aayā

mar ga.e par bhī hameñ diid kā āzār rahā

chuum liiñ nashshe meñ aaj un kī nashīlī āñkheñ

ain be-hoshī-e-lazzat meñ bhī hoshiyār rahā

ruḳh se apne jo naqāb us ne uThāyā to kyā

parda-e-sharm-o-hayā māne-e-dīdār rahā

dasht-e-vahshat meñ rahe qais se lākhoñ hamrāh

saare dīvānoñ kā maiñ qāfila-sālār rahā

be-ḳhatā kaun dil-āzār ḳhafā thā tum se

umr-bhar tū jo 'qalaq' ziist se bezār rahā

yar ke nargis-e-bimar ka bimar raha

yahi aazar mere darpai-e-azar raha

umr-bhar shefta-e-chashm-o-lab-e-yar raha

kabhi surat rahi mujh ko kabhi bimar raha

dil ko mere na zara ranj shab-e-tar raha

sham-e-afroz KHayal-e-ruKH-e-kaddar raha

lab pe dil-soKHton ke nala sharar-bar raha

sard-mehri ka tere garm ye bazar raha

main fida ruKH pe wo zulfon ka giraftar raha

dil ko tujh se na mujhe dil se sarokar raha

KHud-faroshi sar-e-bazar jo lai un ko

misr mein ek na yusuf ka KHaridar raha

mere marne se phansa dam-e-gham-o-ranj mein wo

main riha ho gaya sayyaad giraftar raha

but-parasti mein bhi bhuli na mujhe yaad-e-KHuda

hath mein subha gale mein mere zunnar raha

lakh asiron ko kiya tum ne riha zindan se

ek mahrum-e-inayat ye gunahgar raha

teri ai wahshat-e-dil dast-daraazi na gai

baad-e-murdan bhi kafan mein na koi tar raha

rauzan-e-qabr se jhanke jo wo isa aaya

mar gae par bhi hamein did ka aazar raha

chum lin nashshe mein aaj un ki nashili aankhen

ain be-hoshi-e-lazzat mein bhi hoshiyar raha

ruKH se apne jo naqab us ne uThaya to kya

parda-e-sharm-o-haya mane-e-didar raha

dasht-e-wahshat mein rahe qais se lakhon hamrah

sare diwanon ka main qafila-salar raha

be-KHata kaun dil-azar KHafa tha tum se

umr-bhar tu jo 'qalaq' zist se bezar raha