yar ne humse be-adai ki

yaar ne ham se be-adā.ī kī

vasl kī raat meñ laḌā.ī kī

bāl-o-par bhī ga.e bahār ke saath

ab tavaqqo nahīñ rihā.ī kī

kulfat-e-ranj-e-ishq kam na huī

maiñ davā kī bahut shifā.ī kī

turfa raftār ke haiñ rafta sab

dhuum hai us kī rahgirā.ī kī

ḳhanda-e-yār se taraf ho kar

barq ne apnī jag-hañsā.ī kī

kuchh muravvat na thī un āñkhoñ meñ

dekh kar kyā ye āshnā.ī kī

vasl ke din ko kār-e-jāñ na khiñchā

shab na āḳhir huī judā.ī kī

muñh lagāyā na duḳhtar-e-raz ko

maiñ javānī meñ pārsā.ī kī

jaur us sañg-dil ke sab na khiñche

umr ne saḳht bevafā.ī kī

kohkan kyā pahāḌ toḌegā

ishq ne zor-āzmā.ī kī

chupke us kī galī meñ phirte rahe

der vaañ ham ne be-navā.ī kī

ik nigah meñ hazār jī maare

sāhirī kī ki dilrubā.ī kī

nisbat us āstāñ se kuchh na huī

barsoñ tak ham ne jab.ha-sā.ī kī

'mīr' kī bandagī meñ jāñ-bāzī

sair sī ho ga.ī ḳhudā.ī kī

yar ne hum se be-adai ki

wasl ki raat mein laDai ki

baal-o-par bhi gae bahaar ke sath

ab tawaqqo nahin rihai ki

kulfat-e-ranj-e-ishq kam na hui

main dawa ki bahut shifai ki

turfa raftar ke hain rafta sab

dhum hai us ki rahgirai ki

KHanda-e-yar se taraf ho kar

barq ne apni jag-hansai ki

kuchh murawwat na thi un aankhon mein

dekh kar kya ye aashnai ki

wasl ke din ko kar-e-jaan na khincha

shab na aaKHir hui judai ki

munh lagaya na duKHtar-e-raz ko

main jawani mein parsai ki

jaur us sang-dil ke sab na khinche

umr ne saKHt bewafai ki

kohkan kya pahaD toDega

ishq ne zor-azmai ki

chupke us ki gali mein phirte rahe

der wan hum ne be-nawai ki

ek nigah mein hazar ji mare

sahiri ki ki dilrubai ki

nisbat us aastan se kuchh na hui

barson tak hum ne jabha-sai ki

'mir' ki bandagi mein jaan-bazi

sair si ho gai KHudai ki