yaro kahan tak aur mohabbat nibhaun main

yaaro kahāñ tak aur mohabbat nibhā.ūñ maiñ

do mujh ko bad-duā ki use bhuul jā.ūñ maiñ

dil to jalā kiyā hai vo sho.ala sā aadmī

ab kis ko chhū ke haath bhī apnā jalā.ūñ maiñ

suntā huuñ ab kisī se vafā kar rahā hai vo

ai zindagī ḳhushī se kahīñ mar na jā.ūñ maiñ

ik shab bhī vasl kī na mirā saath de sakī

ahd-e-firāq aa ki tujhe āzmā.ūñ maiñ

badnām mere qatl se tanhā tū hī na ho

lā apnī mohr bhī sar-e-mahzar lagā.ūñ maiñ

utrā hai baam se koī ilhām kī tarah

jī chāhtā hai saarī zamīñ ko sajā.ūñ maiñ

us jaisā naam rakh ke agar aa.e maut bhī

hañs kar use 'qatīl' gale se lagā.ūñ maiñ

yaro kahan tak aur mohabbat nibhaun main

do mujh ko bad-dua ki use bhul jaun main

dil to jala kiya hai wo shoala sa aadmi

ab kis ko chhu ke hath bhi apna jalaun main

sunta hun ab kisi se wafa kar raha hai wo

ai zindagi KHushi se kahin mar na jaun main

ek shab bhi wasl ki na mera sath de saki

ahd-e-firaq aa ki tujhe aazmaun main

badnam mere qatl se tanha tu hi na ho

la apni mohr bhi sar-e-mahzar lagaun main

utra hai baam se koi ilham ki tarah

ji chahta hai sari zamin ko sajaun main

us jaisa nam rakh ke agar aae maut bhi

hans kar use 'qatil' gale se lagaun main