yaron ke iKHlas se pahle dil ka mere ye haal na tha

yāroñ ke iḳhlās se pahle dil kā mire ye haal na thā

ab vo chaknāchūr paḌā hai jis shīshe meñ baal na thā

insāñ aa kar na.ī Dagar par kho baiThā hai hosh-o-havās

pahle bhī behosh thā lekin aisā bhī bad-hāl na thā

gulshan gulshan vīrānī hai jañgal jañgal sannāTā

haa.e vo din jab har manzil meñ shorish-e-ġham kā kaal na thā

kyuuñ re divāne shahr yahī hai ik ik pal bhārī hai jahāñ

apne vīrāne meñ ai dil jī kā ye janjāl na thā

ham jo luTe us shahr meñ jā kar dukh logoñ ko kyuuñ pahuñchā

apnī nazar thī apnā dil thā koī parāyā maal na thā

terī ḳhaak pe raushan raushan 'aḳhtar' jaise sitāre the

tujh sā ai mahrān kī vaadī koī buland-iqbāl na thā

yaron ke iKHlas se pahle dil ka mere ye haal na tha

ab wo chaknachur paDa hai jis shishe mein baal na tha

insan aa kar nai Dagar par kho baiTha hai hosh-o-hawas

pahle bhi behosh tha lekin aisa bhi bad-haal na tha

gulshan gulshan virani hai jangal jangal sannaTa

hae wo din jab har manzil mein shorish-e-gham ka kal na tha

kyun re diwane shahr yahi hai ek ek pal bhaari hai jahan

apne virane mein ai dil ji ka ye janjal na tha

hum jo luTe us shahr mein ja kar dukh logon ko kyun pahuncha

apni nazar thi apna dil tha koi paraya mal na tha

teri KHak pe raushan raushan 'aKHtar' jaise sitare the

tujh sa ai mahran ki wadi koi buland-iqbaal na tha