yaron ki humse dil-shikani ho sake kahan

yāroñ kī ham se dil-shikanī ho sake kahāñ

yaañ paas hai na ḳhātir-e-aġhyār toḌiye

ham jaur-e-chashm-e-yār se dam mārte nahīñ

ya.anī ravā hai kab dil-e-bīmār toḌiye

yaañ dard-e-sar ḳhumār se hai vaañ dukān band

Takrā ke sar ko ab dar-e-ḳhummār toḌiye

Takrā.ūñ vaañ jo sar to vo kahtā hai kyā mujhe

sāhab na mujh ġharīb kī dīvār toḌiye

dam toḌnā hai furqat-e-jānāñ meñ apnā kaam

kuchh kohkan nahīñ haiñ jo kohsār toḌiye

'nāsiḳh' ba-qaul-e-afsah-e-hindostāñ kabhī

zāhid kā dil na ḳhāna-e-ḳhummār toḌiye

yaron ki hum se dil-shikani ho sake kahan

yan pas hai na KHatir-e-aghyar toDiye

hum jaur-e-chashm-e-yar se dam marte nahin

yani rawa hai kab dil-e-bimar toDiye

yan dard-e-sar KHumar se hai wan dukan band

Takra ke sar ko ab dar-e-KHummar toDiye

Takraun wan jo sar to wo kahta hai kya mujhe

sahab na mujh gharib ki diwar toDiye

dam toDna hai furqat-e-jaanan mein apna kaam

kuchh kohkan nahin hain jo kohsar toDiye

'nasiKH' ba-qaul-e-afsah-e-hindostan kabhi

zahid ka dil na KHana-e-KHummar toDiye