yas hi se kabhi guzar pyare

yaas hī se kabhī guzar pyāre

muntazir haiñ dil-o-nazar pyāre

phuul khilte ga.e mohabbat ke

tū ne dekhā jidhar-jidhar pyāre

gauhar-e-dil kī qadr kyā karte

ye hasīñ log kam-nazar pyāre

do qadam saath kyā chale ham tum

baat pahuñchī nagar-nagar pyāre

maiñ to ḳhud hī fareb-ḳhurda huuñ

tū mirī justujū na kar pyāre

ban ga.e log sāhab-e-daulat

jins-e-īmāñ ko bech kar pyāre

yuuñ to ahbāb aur bhī haiñ bahut

tujh se baḌh kar nahīñ magar pyāre

tañg-dastī meñ dekhnā 'nusrat'

bik na jaa.e kahīñ hunar pyāre

yas hi se kabhi guzar pyare

muntazir hain dil-o-nazar pyare

phul khilte gae mohabbat ke

tu ne dekha jidhar-jidhar pyare

gauhar-e-dil ki qadr kya karte

ye hasin log kam-nazar pyare

do qadam sath kya chale hum tum

baat pahunchi nagar-nagar pyare

main to KHud hi fareb-KHurda hun

tu meri justuju na kar pyare

ban gae log sahab-e-daulat

jins-e-iman ko bech kar pyare

yun to ahbab aur bhi hain bahut

tujh se baDh kar nahin magar pyare

tang-dasti mein dekhna 'nusrat'

bik na jae kahin hunar pyare