yas-o-hiras-o-jaur-o-jafa se alag-thalag

yās-o-hirās-o-jaur-o-jafā se alag-thalag

ik sā.ebāñ hai qahr-e-ḳhudā se alag-thalag

dekho uThā hai vo bhī alāmat ke taur par

dast-e-darāz dast-e-duā se alag-thalag

parvāna-e-havā-o-havas haañ barā.e-shauq

koī maqām sham-e-vafā se alag-thalag

kab tak rahegā vahshī-e-ehsās-o-āgahī

nā-sāzgār āb-o-havā se alag-thalag

mil jā.egā hisār-e-azīmat ke aas paas

karb-e-sukūt āh-o-bukā se alag-thalag

sad-hādsāt-e-ḳhām haiñ ibrat-nigāh meñ

tārīḳh-sāz jurm-o-sazā se alag-thalag

is ḳhauf se na sehr-bayānī pe harf aa.e

'rāhī' rahe haiñ chūn-o-charā se alag-thalag

yas-o-hiras-o-jaur-o-jafa se alag-thalag

ek saeban hai qahr-e-KHuda se alag-thalag

dekho uTha hai wo bhi alamat ke taur par

dast-e-daraaz dast-e-dua se alag-thalag

parwana-e-hawa-o-hawas han barae-shauq

koi maqam sham-e-wafa se alag-thalag

kab tak rahega wahshi-e-ehsas-o-agahi

na-sazgar aab-o-hawa se alag-thalag

mil jaega hisar-e-azimat ke aas pas

karb-e-sukut aah-o-buka se alag-thalag

sad-hadsat-e-KHam hain ibrat-nigah mein

tariKH-saz jurm-o-saza se alag-thalag

is KHauf se na sehr-bayani pe harf aae

'rahi' rahe hain chun-o-chara se alag-thalag