yahan ghamon ki hai bohtat aur KHushi kam hai

yahāñ ġhamoñ kī hai bohtāt aur ḳhushī kam hai

chale bhī aao ki apnī bhī zindagī kam hai

zarā sī der Thahar jaao jugnuoñ aa kar

hamāre ghar meñ charāġhoñ kī raushnī kam hai

nikal chuke ho jo ghar se kahīñ Thahar jaao

hamāre shahr meñ amn-o-amāñ abhī kam hai

tumhāre aane se phailegī ḳhushbueñ har sū

chale bhī aao gulāboñ meñ dil-kashī kam hai

vo nafratoñ kā khilāḌī hai us ke chehre par

fareb chhāyā hai shiddat se sādgī kam hai

tumhāre hoñT bhī ḳhālī haiñ muskurāhaT se

hamāre sūkhe laboñ pe bhī ab ḳhushī kam hai

zamīr bech ke karte haiñ aish ye har dam

hamāre daur ke logoñ meñ ab ḳhudī kam hai

sabhī ko apne hī hālāt ne badal Daalā

milā to karte haiñ aapas meñ dostī kam hai

sikhā diyā hai zamāne ne ye hunar 'sājid'

hamāre lahje meñ pahle se be-ruḳhī kam hai

yahan ghamon ki hai bohtat aur KHushi kam hai

chale bhi aao ki apni bhi zindagi kam hai

zara si der Thahar jao jugnuon aa kar

hamare ghar mein charaghon ki raushni kam hai

nikal chuke ho jo ghar se kahin Thahar jao

hamare shahr mein amn-o-aman abhi kam hai

tumhaare aane se phailegi KHushbuen har su

chale bhi aao gulabon mein dil-kashi kam hai

wo nafraton ka khilaDi hai us ke chehre par

fareb chhaya hai shiddat se sadgi kam hai

tumhaare honT bhi KHali hain muskurahaT se

hamare sukhe labon pe bhi ab KHushi kam hai

zamir bech ke karte hain aish ye har dam

hamare daur ke logon mein ab KHudi kam hai

sabhi ko apne hi haalat ne badal Dala

mila to karte hain aapas mein dosti kam hai

sikha diya hai zamane ne ye hunar 'sajid'

hamare lahje mein pahle se be-ruKHi kam hai