yahan hai dhup wahan sae hain chale jao

yahāñ hai dhuup vahāñ saa.e haiñ chale jaao

ye log lene tumheñ aa.e haiñ chale jaao

bulāvā aayā hai jaane meñ koī harj nahīñ

yahāñ bhī dukh hī sadā paa.e haiñ chale jaao

vo jis ke vāste bulvāyā jā rahā hai tumheñ

agar ye log use laa.e haiñ chale jaao

paḌe rahoge yahāñ kab talak bure hāloñ

vahāñ to husn ke sarmā.e haiñ chale jaao

maiñ kyā batā.ūñ vahāñ kyā hai jo nahīñ hai yahāñ

nashāt-e-rūh ke pairā.e haiñ chale jaao

maiñ rok pā.ūñgā aañsū na ruḳhsatī pe magar

kahār Dolī jo le aa.e haiñ chale jaao

tumheñ to qabr kī miTTī bhī ab pukārtī hai

yahāñ ke log bhī uktā.e haiñ chale jaao

gurez itnā bhī sābir-'zafar' nahīñ achchhā

payām us ne jo bhijvā.e haiñ chale jaao

yahan hai dhup wahan sae hain chale jao

ye log lene tumhein aae hain chale jao

bulawa aaya hai jaane mein koi harj nahin

yahan bhi dukh hi sada pae hain chale jao

wo jis ke waste bulwaya ja raha hai tumhein

agar ye log use lae hain chale jao

paDe rahoge yahan kab talak bure haalon

wahan to husn ke sarmae hain chale jao

main kya bataun wahan kya hai jo nahin hai yahan

nashat-e-ruh ke pairae hain chale jao

main rok paunga aansu na ruKHsati pe magar

kahaar Doli jo le aae hain chale jao

tumhein to qabr ki miTTi bhi ab pukarti hai

yahan ke log bhi uktae hain chale jao

gurez itna bhi sabir-'zafar' nahin achchha

payam us ne jo bhijwae hain chale jao