yahan jo hai kahan us ka nishan baqi rahega

yahāñ jo hai kahāñ us kā nishāñ baaqī rahegā

magar jo kuchh nahīñ vo sab yahāñ baaqī rahegā

safar hogā safar kī manzileñ mādūm hoñgī

makāñ baaqī na hogā lā-makāñ baaqī rahegā

kabhī qarya-ba-qarya aur kabhī ālam-ba-ālam

ġhubār-e-hijrat-e-be-ḳhānamāñ baaqī rahegā

hamāre saath jab tak dard kī dhaḌkan rahegī

tire pahlū meñ hone kā gumāñ baaqī rahegā

bahut be-e'tibārī se guzar kar dil mile haiñ

bahut din tak takalluf darmiyāñ baaqī rahegā

rahegā āsmāñ jab tak zamīñ baaqī rahegī

zamīñ qaa.im hai jab tak āsmāñ baaqī rahegā

ye duniyā hashr tak ābād rakkhī jā sakegī

yahāñ ham sā jo koī ḳhush-bayāñ baaqī rahegā

junūñ ko aisī umr-e-jāvedāñ baḳhshī ga.ī hai

qayāmat tak giroh-e-āshiqāñ baaqī rahegā

tamaddun ko bachā lene kī mohlat ab kahāñ hai

sar-e-girdāb kab tak bādbāñ baaqī rahegā

hamārā hausla qaa.im hai jab tak sā.ebāñ hai

ḳhudā jaane kahāñ tak sā.ebāñ baaqī rahegā

tujhe mālūm hai yā kuchh hameñ apnī ḳhabar hai

so ham mar jā.eñge tū hī yahāñ baaqī rahegā

yahan jo hai kahan us ka nishan baqi rahega

magar jo kuchh nahin wo sab yahan baqi rahega

safar hoga safar ki manzilen madum hongi

makan baqi na hoga la-makan baqi rahega

kabhi qarya-ba-qarya aur kabhi aalam-ba-alam

ghubar-e-hijrat-e-be-KHanaman baqi rahega

hamare sath jab tak dard ki dhaDkan rahegi

tere pahlu mein hone ka guman baqi rahega

bahut be-e'tibari se guzar kar dil mile hain

bahut din tak takalluf darmiyan baqi rahega

rahega aasman jab tak zamin baqi rahegi

zamin qaim hai jab tak aasman baqi rahega

ye duniya hashr tak aabaad rakkhi ja sakegi

yahan hum sa jo koi KHush-bayan baqi rahega

junun ko aisi umr-e-jawedan baKHshi gai hai

qayamat tak giroh-e-ashiqan baqi rahega

tamaddun ko bacha lene ki mohlat ab kahan hai

sar-e-girdab kab tak baadban baqi rahega

hamara hausla qaim hai jab tak saeban hai

KHuda jaane kahan tak saeban baqi rahega

tujhe malum hai ya kuchh hamein apni KHabar hai

so hum mar jaenge tu hi yahan baqi rahega