yahan tayyun-e-qadr-e-hayat kya karte

yahāñ ta.ayyun-e-qadr-e-hayāt kyā karte

ki rāste hī meñ manzil kī baat kyā karte

qasam to khaa.ī thī manzil pe jā ke dam leñge

pakaḌ ke paañv mirā hādsāt kyā karte

the kaan band to āñkhoñ kī gum thī bīnā.ī

sadā.eñ de ke bhalā vāqi.āt kyā karte

hameñ to fikr thī vaa.iz kī rustagārī kī

ham apne haq meñ duā-e-najāt kyā karte

hamārī tishna-labī to rahīn-e-ḳhanjar thī

koī batā.e ki le kar furāt kyā karte

navāzish-e-ġham-e-daurāñ hī kam na thī 'nātiq'

idhar vo apnā ruḳh-e-iltifāt kyā karte

yahan tayyun-e-qadr-e-hayat kya karte

ki raste hi mein manzil ki baat kya karte

qasam to khai thi manzil pe ja ke dam lenge

pakaD ke panw mera hadsat kya karte

the kan band to aankhon ki gum thi binai

sadaen de ke bhala waqiat kya karte

hamein to fikr thi waiz ki rustagari ki

hum apne haq mein dua-e-najat kya karte

hamari tishna-labi to rahin-e-KHanjar thi

koi batae ki le kar furaat kya karte

nawazish-e-gham-e-dauran hi kam na thi 'natiq'

idhar wo apna ruKH-e-iltifat kya karte