yahan takrar-e-saat ke siwa kya rah gaya hai

yahāñ takrār-e-sā.at ke sivā kyā rah gayā hai

musalsal ek hālat ke sivā kyā rah gayā hai

tumheñ fursat ho duniyā se to ham se aa ke milnā

hamāre paas fursat ke sivā kyā rah gayā hai

bahut mumkin hai kuchh din meñ use ham tark kar deñ

tumhārā qurb aadat ke sivā kyā rah gayā hai

bahut nādim kiyā thā ham ne ik shīrīñ-suḳhan ko

so ab ḳhud par nadāmat ke sivā kyā rah gayā hai

hamārā ishq bhī ab maand hai jaise ki tum ho

to ye saudā ri.āyat ke sivā kyā rah gayā hai

kahāñ le jaa.eñ ai dil ham tirī vus.at-pasandī

ki ab duniyā meñ vus.at ke sivā kyā rah gayā hai

salāmat hai koī ḳhvāhish na koī yaad zinda

batā ai shaam vahshat ke sivā kyā rah gayā hai

kisī aahaT meñ aahaT ke sivā kuchh bhī nahīñ ab

kisī sūrat meñ sūrat ke sivā kyā rah gayā hai

bahut lambā safar tai ho chukā hai zehn o dil kā

tumhārā ġham alāmat ke sivā kyā rah gayā hai

aziyyat thī magar lazzat bhī kuchh is se sivā thī

aziyyat hai aziyyat ke sivā kyā rah gayā hai

hamāre darmiyāñ saarī hī bāteñ ho chukī haiñ

so ab in kī vazāhat ke sivā kyā rah gayā hai

bajā kahte ho tum honī to ho kar hī rahegī

to hone ko qayāmat ke sivā kyā rah gayā hai

shumār o be-shumārī ke taraddud se guzar kar

ma.āl-e-ishq-e-vahdat ke sivā kyā rah gayā hai

yahan takrar-e-saat ke siwa kya rah gaya hai

musalsal ek haalat ke siwa kya rah gaya hai

tumhein fursat ho duniya se to hum se aa ke milna

hamare pas fursat ke siwa kya rah gaya hai

bahut mumkin hai kuchh din mein use hum tark kar den

tumhaara qurb aadat ke siwa kya rah gaya hai

bahut nadim kiya tha hum ne ek shirin-suKHan ko

so ab KHud par nadamat ke siwa kya rah gaya hai

hamara ishq bhi ab mand hai jaise ki tum ho

to ye sauda riayat ke siwa kya rah gaya hai

kahan le jaen ai dil hum teri wusat-pasandi

ki ab duniya mein wusat ke siwa kya rah gaya hai

salamat hai koi KHwahish na koi yaad zinda

bata ai sham wahshat ke siwa kya rah gaya hai

kisi aahaT mein aahaT ke siwa kuchh bhi nahin ab

kisi surat mein surat ke siwa kya rah gaya hai

bahut lamba safar tai ho chuka hai zehn o dil ka

tumhaara gham alamat ke siwa kya rah gaya hai

aziyyat thi magar lazzat bhi kuchh is se siwa thi

aziyyat hai aziyyat ke siwa kya rah gaya hai

hamare darmiyan sari hi baaten ho chuki hain

so ab in ki wazahat ke siwa kya rah gaya hai

baja kahte ho tum honi to ho kar hi rahegi

to hone ko qayamat ke siwa kya rah gaya hai

shumar o be-shumari ke taraddud se guzar kar

maal-e-ishq-e-wahdat ke siwa kya rah gaya hai