yahin tha baiTha hua darmiyan kahan gaya main

yahīñ thā baiThā huā darmiyāñ kahāñ gayā maiñ

ki mil rahā nahīñ apnā nishāñ kahāñ gayā maiñ

na kar rahā hai fulāñ ko fulāñ ḳhabar merī

na pūchhtā hai fulāñ se fulāñ kahāñ gayā maiñ

nishān miltā hai hāzir meñ kab guzishta kā

batā sakeñge na ā.indagāñ kahāñ gayā maiñ

saje hue haiñ piyāda o asp o fiil tamām

bichhī huī hai bisāt-e-jahāñ kahāñ gayā maiñ

maiñ kab nahīñ thā akārat magar rahā hāzir

huā huuñ ab ke ajab rā.egāñ kahāñ gayā maiñ

jise yaqīn thā har suud meñ ḳhasāre kā

thā apne-āp meñ sharh-e-ziyāñ kahāñ gayā maiñ

agar thā pahle hī nām-o-nishāñ mirā mafqūd

to ho ke bār-e-digar be-nishāñ kahāñ gayā maiñ

na bhejtā hai koī nāma-e-firāq mujhe

na DhūñDhtā hai pata ḳhat-rasāñ kahāñ gayā maiñ

jo kar rahā thā guzishta ke vāqi.āt durust

sunā rahā thā ulaT dāstāñ kahāñ gayā maiñ

liyā gayā huuñ hirāsat meñ be-amānī kī

ki be-amān thā shahr-e-amāñ kahāñ gayā maiñ

uThā ke le gayā dāroġha-e-fanā shāyad

khulā huā hai dar-e-ḳhāk-dāñ kahāñ gayā maiñ

bujhī nahīñ mire ātish-kade kī aag abhī

uThā nahīñ hai badan se dhuāñ kahāñ gayā maiñ

nahīñ huā huuñ magar is tarah kabhī ġhā.eb

rahā hamesha nihāñ dar-ayāñ kahāñ gayā maiñ

yahin tha baiTha hua darmiyan kahan gaya main

ki mil raha nahin apna nishan kahan gaya main

na kar raha hai fulan ko fulan KHabar meri

na puchhta hai fulan se fulan kahan gaya main

nishan milta hai hazir mein kab guzishta ka

bata sakenge na aaindagan kahan gaya main

saje hue hain piyaada o asp o fil tamam

bichhi hui hai bisat-e-jahan kahan gaya main

main kab nahin tha akarat magar raha hazir

hua hun ab ke ajab raegan kahan gaya main

jise yaqin tha har sud mein KHasare ka

tha apne-ap mein sharh-e-ziyan kahan gaya main

agar tha pahle hi nam-o-nishan mera mafqud

to ho ke bar-e-digar be-nishan kahan gaya main

na bhejta hai koi nama-e-firaq mujhe

na DhunDhta hai pata KHat-rasan kahan gaya main

jo kar raha tha guzishta ke waqiat durust

suna raha tha ulaT dastan kahan gaya main

liya gaya hun hirasat mein be-amani ki

ki be-aman tha shahr-e-aman kahan gaya main

uTha ke le gaya darogha-e-fana shayad

khula hua hai dar-e-KHak-dan kahan gaya main

bujhi nahin mere aatish-kade ki aag abhi

uTha nahin hai badan se dhuan kahan gaya main

nahin hua hun magar is tarah kabhi ghaeb

raha hamesha nihan dar-ayan kahan gaya main