yak-ba-yak shorish-e-fughan ki tarah

yak-ba-yak shorish-e-fuġhāñ kī tarah

fasl-e-gul aa.ī imtihāñ kī tarah

sehn-e-gulshan meñ bahr-e-mushtāqāñ

har ravish khiñch ga.ī kamāñ kī tarah

phir lahū se har ek kāsa-e-dāġh

pur huā jām-e-arġhavāñ kī tarah

yaad aayā junūn-e-gum-gashta

be-talab qarz-e-dostāñ kī tarah

jaane kis par ho mehrbāñ qātil

be-sabab marg-e-nā-gahāñ kī tarah

har sadā par lage haiñ kaan yahāñ

dil sambhāle raho zabāñ kī tarah

yak-ba-yak shorish-e-fughan ki tarah

fasl-e-gul aai imtihan ki tarah

sehn-e-gulshan mein bahr-e-mushtaqan

har rawish khinch gai kaman ki tarah

phir lahu se har ek kasa-e-dagh

pur hua jam-e-arghawan ki tarah

yaad aaya junun-e-gum-gashta

be-talab qarz-e-dostan ki tarah

jaane kis par ho mehrban qatil

be-sabab marg-e-na-gahan ki tarah

har sada par lage hain kan yahan

dil sambhaale raho zaban ki tarah