yak dast-e-fitna barpa humne jahan mein dekha

yak dast-e-fitna barpā ham ne jahāñ meñ dekhā

mansūr ko sarāsar dārul-amāñ meñ dekhā

ātish jigar meñ gaahe gah sho.ala jaañ meñ dekhā

allāh ham ne kyā kyā ishq-e-butāñ meñ dekhā

kis sho.ala-rū kī ulfat juuñ barq dil meñ chamkī

ātish kā yak zubāna kām-o-dahāñ meñ dekhā

ham ko kafan usī kā lāzim hai māh-rū yaañ

ulfat kā partav-āsā ham ne katāñ meñ dekhā

jo haiñ khare unhīñ ko das khoTiyāñ sunā.e

ham ne nayā salīqa us naujavāñ meñ dekhā

ai ahl-e-dil ḳhudā-e-dil ne yahāñ dikhā.e

dillī meñ thā jo dekhā kū-e-butāñ meñ dekhā

us ḳhāk-e-pā kā surma āñkhoñ meñ jab na dekhā

kyā ḳhaak aa ke ham ne is ḳhāk-dāñ meñ dekhā

kyā rang ashk-e-ḳhūnīñ furqat meñ haiñ dikhātī

rañg-e-bahār ham ne fasl-e-ḳhizāñ meñ dekhā

aañsū sadā ravāñ haiñ apnā hai ab ye naqsha

yārab ye kis kā naqsha āb-e-ravāñ meñ dekhā

tujh ko kabhī na dekhā dekhā jahān saarā

garche tujhī ko maiñ ne saare jahāñ meñ dekhā

jitne haiñ ahl-e-jauhar un ko zamīñ na paave

ham ne ġharaz ye jauhar is āsmāñ meñ dekhā

shohra hai lucknow kā lekin naūz-billāh

momin jo vaañ haiñ un ko kufr-e-nihāñ meñ dekhā

dillī ke hinduoñ meñ haiñ ahl-e-dil hazāroñ

dillī sā shahr kis ne hindostāñ meñ dekhā

do din se maiñ judā huuñ us mū kamar se 'ehsāñ'

ik sau tarah kā sadma is darmiyāñ meñ dekhā

yak dast-e-fitna barpa hum ne jahan mein dekha

mansur ko sarasar darul-aman mein dekha

aatish jigar mein gahe gah shoala jaan mein dekha

allah hum ne kya kya ishq-e-butan mein dekha

kis shoala-ru ki ulfat jun barq dil mein chamki

aatish ka yak zubana kaam-o-dahan mein dekha

hum ko kafan usi ka lazim hai mah-ru yan

ulfat ka partaw-asa hum ne katan mein dekha

jo hain khare unhin ko das khoTiyan sunae

hum ne naya saliqa us naujawan mein dekha

ai ahl-e-dil KHuda-e-dil ne yahan dikhae

dilli mein tha jo dekha ku-e-butan mein dekha

us KHak-e-pa ka surma aankhon mein jab na dekha

kya KHak aa ke hum ne is KHak-dan mein dekha

kya rang ashk-e-KHunin furqat mein hain dikhati

rang-e-bahaar hum ne fasl-e-KHizan mein dekha

aansu sada rawan hain apna hai ab ye naqsha

yarab ye kis ka naqsha aab-e-rawan mein dekha

tujh ko kabhi na dekha dekha jahan sara

garche tujhi ko main ne sare jahan mein dekha

jitne hain ahl-e-jauhar un ko zamin na pawe

hum ne gharaz ye jauhar is aasman mein dekha

shohra hai lucknow ka lekin nauz-billah

momin jo wan hain un ko kufr-e-nihan mein dekha

dilli ke hinduon mein hain ahl-e-dil hazaron

dilli sa shahr kis ne hindostan mein dekha

do din se main juda hun us mu kamar se 'ehsan'

ek sau tarah ka sadma is darmiyan mein dekha