yak lamha sahi umr ka arman hi rah jae

yak lamha sahī 'umr kā armān hī rah jaa.e

is ḳhalvat-e-yaḳh meñ koī mehmān hī rah jaa.e

qurbat meñ shab-e-garm kā mausam hai tirā jism

ye ḳhitta-e-jāñ vaqf-e-zamistān hī rah jaa.e

mujh shāḳh-e-barahna pe sajā barf kī kaliyāñ

patjhaḌ pe tire husn kā ehsān hī rah jaa.e

farfāg ke āshob meñ jam jaatī haiñ socheñ

is karb-e-qayāmat meñ tirā dhyān hī rah jaa.e

tujh bin to sunā.ī na de sūraj kī sadā bhī

dil dasht-e-havā-basta hai sunsān hī rah jaa.e

marmar kī siloñ meñ to ghuTe aage kā dam bhī

ye qarya-e-jānāñ hai yahāñ jaan hī rah jaa.e

sochūñ to shu'ā'oñ se tarāshūñ tirā paikar

chhū luuñ to vahī barf kā insān hī rah jaa.e

ye shaam ye chāñdī kā barastā huā jharnā

koī tirī zulfoñ meñ pareshān hī rah jaa.e

sūrat se vo gul-barf sahī phir bhī 'atā-shād'

tāsīr meñ vo mushk kī pahchān hī rah jaa.e

yak lamha sahi 'umr ka arman hi rah jae

is KHalwat-e-yaKH mein koi mehman hi rah jae

qurbat mein shab-e-garm ka mausam hai tera jism

ye KHitta-e-jaan waqf-e-zamistan hi rah jae

mujh shaKH-e-barahna pe saja barf ki kaliyan

patjhaD pe tere husn ka ehsan hi rah jae

farfag ke aashob mein jam jati hain sochen

is karb-e-qayamat mein tera dhyan hi rah jae

tujh bin to sunai na de suraj ki sada bhi

dil dasht-e-hawa-basta hai sunsan hi rah jae

marmar ki silon mein to ghuTe aage ka dam bhi

ye qarya-e-jaanan hai yahan jaan hi rah jae

sochun to shu'a'on se tarashun tera paikar

chhu lun to wahi barf ka insan hi rah jae

ye sham ye chandi ka barasta hua jharna

koi teri zulfon mein pareshan hi rah jae

surat se wo gul-barf sahi phir bhi 'ata-shad'

tasir mein wo mushk ki pahchan hi rah jae