yakta-e-rozgar hamara makan tha

yaktā-e-rozgār hamārā makān thā

nīche zamīñ thī sar pe khulā āsmān thā

ab shāḳh-e-āshiyāñ hai na tinke nasīb haiñ

aa.egā aisā vaqt bhī kis ko gumān thā

aayā jo inqalāb to sab kuchh badal gayā

pahle yahī zamīñ thī yahī āsmān thā

tanhā.iyoñ ne farz-e-ziyāfat adā kiyā

kal raat apne ghar hī meñ maiñ mehmān thā

aaj un pe multafit hai yahī inqalāb hai

ham par bhī ye zamāna kabhī mehrbān thā

us ko sazā de ham ko barī kis tarah kare

munsif kā imtihān hamārā bayān thā

'kausar' ḳhudā se koī shikāyat na kījiye

ye sochiye ki pahle vo kyoñ mehrbān thā

yakta-e-rozgar hamara makan tha

niche zamin thi sar pe khula aasman tha

ab shaKH-e-ashiyan hai na tinke nasib hain

aaega aisa waqt bhi kis ko guman tha

aaya jo inqalab to sab kuchh badal gaya

pahle yahi zamin thi yahi aasman tha

tanhaiyon ne farz-e-ziyafat ada kiya

kal raat apne ghar hi mein main mehman tha

aaj un pe multafit hai yahi inqalab hai

hum par bhi ye zamana kabhi mehrban tha

us ko saza de hum ko bari kis tarah kare

munsif ka imtihan hamara bayan tha

'kausar' KHuda se koi shikayat na kijiye

ye sochiye ki pahle wo kyon mehrban tha