yaqin-e-mohkam se kaam lena na darmiyan ehtimal rakhna

yaqīn-e-mohkam se kaam lenā na darmiyāñ ehtimāl rakhnā

samundaroñ ke safar pe jaanā to hausle bhī kamāl rakhnā

hazār zād-e-safar se baḌh kar vo ek chhoTī sī baat Thahrī

ba-vaqt-e-ruḳhsat kisī kā kahnā safar meñ apnā ḳhayāl rakhnā

tum apnī ḳhātir bachā ke rakhnā masarratoñ kī tamām ghaḌiyāñ

jahān bhar kī udāsiyoñ ko hamāre hisse meñ Daal rakhnā

chaman ko kis ne lahū se sīñchā guloñ se kis ne fareb khaa.e

savāl aa.e agar vafā kā to sāmne ye savāl rakhnā

ġham-e-jahāñ se nazar bachā ke ham ā.eñge hāl-e-dil sunāne

jo ho sake to hamārī ḳhātir zarā sī fursat nikāl rakhnā

na maslahat se ḳhamosh rahne ke naaz tum ko usuul aa.e

ye kyā ki har baat par bigaḌnā ye kyā ki ik ishti.āl rakhnā

yaqin-e-mohkam se kaam lena na darmiyan ehtimal rakhna

samundaron ke safar pe jaana to hausle bhi kamal rakhna

hazar zad-e-safar se baDh kar wo ek chhoTi si baat Thahri

ba-waqt-e-ruKHsat kisi ka kahna safar mein apna KHayal rakhna

tum apni KHatir bacha ke rakhna masarraton ki tamam ghaDiyan

jahan bhar ki udasiyon ko hamare hisse mein Dal rakhna

chaman ko kis ne lahu se sincha gulon se kis ne fareb khae

sawal aae agar wafa ka to samne ye sawal rakhna

gham-e-jahan se nazar bacha ke hum aaenge haal-e-dil sunane

jo ho sake to hamari KHatir zara si fursat nikal rakhna

na maslahat se KHamosh rahne ke naz tum ko usul aae

ye kya ki har baat par bigaDna ye kya ki ek ishtial rakhna