yaqin hai na guman hai zara sambhal ke chalo

yaqīn hai na gumāñ hai zarā sambhal ke chalo

ajiib rañg-e-jahāñ hai zarā sambhal ke chalo

sulagte ḳhvāboñ kī bastī hai rah-guzār-e-hayāt

yahāñ dhuāñ hī dhuāñ hai zarā sambhal ke chalo

ravish ravish hai guzar-gāh-e-nik.hat-e-barbād

kalī kalī nigarāñ hai zarā sambhal ke chalo

jo zaḳhm de ke ga.ī hai abhī nasīm-e-sahar

sukūt-e-gul se ayaañ hai zarā sambhal ke chalo

ḳhirām-e-nāz mubārak tumheñ magar ye dil

matā-e-shīsha-garāñ hai zarā sambhal ke chalo

surāġh-e-hashr na pā jaa.eñ dekhne vaale

hujūm-e-dīda-varāñ hai zarā sambhal ke chalo

yahāñ zamīn bhī qadmoñ ke saath chaltī hai

ye ālam-e-guzarāñ hai zarā sambhal ke chalo

yaqin hai na guman hai zara sambhal ke chalo

ajib rang-e-jahan hai zara sambhal ke chalo

sulagte KHwabon ki basti hai rah-guzar-e-hayat

yahan dhuan hi dhuan hai zara sambhal ke chalo

rawish rawish hai guzar-gah-e-nikhat-e-barbaad

kali kali nigaran hai zara sambhal ke chalo

jo zaKHm de ke gai hai abhi nasim-e-sahar

sukut-e-gul se ayan hai zara sambhal ke chalo

KHiram-e-naz mubarak tumhein magar ye dil

mata-e-shisha-garan hai zara sambhal ke chalo

suragh-e-hashr na pa jaen dekhne wale

hujum-e-dida-waran hai zara sambhal ke chalo

yahan zamin bhi qadmon ke sath chalti hai

ye aalam-e-guzaran hai zara sambhal ke chalo