yaqin jaaniye is mein koi karamat hai

yaqīn jāniye is meñ koī karāmat hai

jo is dhueñ meñ mirī saañs bhī salāmat hai

nazar bhī haal mire dil kā kah nahīñ paatī

zabāñ kī tarah mirī aañkh meñ bhī luknat hai

jo ho rahā hai use dekhte raho chup chaap

yahī sukūn se jiine kī ek sūrat hai

maiñ us ke jhuuT ko bhī sach samajh ke suntā huuñ

ki us ke jhuuT meñ bhī zindagī kī quvvat hai

ye kis kī aañkh Tikī hai udaas manzar par

ye kaun hai ki jise dekhne kī fursat hai

koī ba.iid nahīñ ye bhī ishtihār chhape

hamāre shahr meñ jallād kī zarūrat hai

sipar tamām badan ke havās Daal chuke

bas ek aañkh hai jis meñ abhī baġhāvat hai

dil-o-dimāġh meñ rishta nahīñ jahāñ koī

ik aise jism meñ jiinā hamārī qismat hai

kahīñ bhī jaa.eñ sazā.eñ hameñ hī milnī haiñ

adālatoñ kī hamārī ajiib hikmat hai

hamāre biich ye uqda na khul sakā ab tak

kise visāl kise hijr kī zarūrat hai

usī ko sauñp diyā ham ne munsifī kī zamām

ki jis ke ḳhvāb meñ bhī aks-e-ġhāsbiyyat hai

yaqin jaaniye is mein koi karamat hai

jo is dhuen mein meri sans bhi salamat hai

nazar bhi haal mere dil ka kah nahin pati

zaban ki tarah meri aankh mein bhi luknat hai

jo ho raha hai use dekhte raho chup chap

yahi sukun se jine ki ek surat hai

main us ke jhuT ko bhi sach samajh ke sunta hun

ki us ke jhuT mein bhi zindagi ki quwwat hai

ye kis ki aankh Tiki hai udas manzar par

ye kaun hai ki jise dekhne ki fursat hai

koi baid nahin ye bhi ishtihaar chhape

hamare shahr mein jallad ki zarurat hai

sipar tamam badan ke hawas Dal chuke

bas ek aankh hai jis mein abhi baghawat hai

dil-o-dimagh mein rishta nahin jahan koi

ek aise jism mein jina hamari qismat hai

kahin bhi jaen sazaen hamein hi milni hain

adalaton ki hamari ajib hikmat hai

hamare bich ye uqda na khul saka ab tak

kise visal kise hijr ki zarurat hai

usi ko saunp diya hum ne munsifi ki zamam

ki jis ke KHwab mein bhi aks-e-ghasbiyyat hai