yaqin ki saltanat thi aur sultani hamari

yaqīñ kī saltanat thī aur sultānī hamārī

damaktī thī duā kī lau se peshānī hamārī

mahaktā thā ghane peḌoñ se vīrāna hamārā

jahān-e-āb-o-gil par thī nigahbānī hamārī

hamāre jism ke TukḌe hue rauñde ga.e ham

magar zinda rahī āñkhoñ meñ hairānī hamārī

ham is ḳhātir tirī tasvīr kā hissa nahīñ the

tire manzar meñ aa jaa.e na vīrānī hamārī

bahut lambe safar kī gard chehroñ par paḌī thī

kisī ne dasht meñ sūrat na pahchānī hamārī

kisī ne kab bhalā jaanā hamārā karb-e-vahshat

kisī ne kab bhalā jaanī pareshānī hamārī

yaqin ki saltanat thi aur sultani hamari

damakti thi dua ki lau se peshani hamari

mahakta tha ghane peDon se virana hamara

jahan-e-ab-o-gil par thi nigahbani hamari

hamare jism ke TukDe hue raunde gae hum

magar zinda rahi aankhon mein hairani hamari

hum is KHatir teri taswir ka hissa nahin the

tere manzar mein aa jae na virani hamari

bahut lambe safar ki gard chehron par paDi thi

kisi ne dasht mein surat na pahchani hamari

kisi ne kab bhala jaana hamara karb-e-wahshat

kisi ne kab bhala jaani pareshani hamari