yaqin TuT chuka hai guman baqi hai

yaqīn TuuT chukā hai gumān baaqī hai

hamāre sar pe abhī āsmān baaqī hai

chale to aa.e haiñ ham ḳhvāb se haqīqat tak

safar tavīl thā ab tak takān baaqī hai

unheñ ye zo.am ki fariyād kā chalan na rahā

hameñ yaqīn ki muñh meñ zabān baaqī hai

har ek samt se pathrāv hai magar ab tak

lahūluhān parinde meñ jaan baaqī hai

fasāna shahr kī ta.amīr kā sunāne ko

galī ke moḌ pe TuuTā makān baaqī hai

milā na jo hameñ qātil kī āstīñ pe 'hasan'

usī lahū kā zamīñ pe nishān baaqī hai

yaqin TuT chuka hai guman baqi hai

hamare sar pe abhi aasman baqi hai

chale to aae hain hum KHwab se haqiqat tak

safar tawil tha ab tak takan baqi hai

unhen ye zoam ki fariyaad ka chalan na raha

hamein yaqin ki munh mein zaban baqi hai

har ek samt se pathraw hai magar ab tak

lahuluhan parinde mein jaan baqi hai

fasana shahr ki tamir ka sunane ko

gali ke moD pe TuTa makan baqi hai

mila na jo hamein qatil ki aastin pe 'hasan'

usi lahu ka zamin pe nishan baqi hai