yaqinan hai koi mah-e-munawwar pichhe chilman ke

yaqīnan hai koī māh-e-munavvar pīchhe chilman ke

ki us kī putliyoñ se aa rahā hai nuur chhan chhan ke

qadam kyūñ-kar na luuñ but-ḳhāne meñ ik ik brahman ke

ki aayā huuñ yahāñ maiñ shauq meñ ik but ke darshan ke

na kyuuñ ā.īna vo dekhā kareñ har vaqt ban ban ke

zamāna hai ye ḳhud-bīnī kā din haiñ un ke joban ke

ye haiñ sāmān-e-ārā.ish junūñ meñ apne maskan ke

udhar TukḌe garebāñ ke idhar purze haiñ dāman ke

hamāre dast-e-vahshat kab haiñ nichle baiThne vaale

uḌā leñge na saare taar jab tak jeb-o-dāman ke

hamārī ḳhāna-vīrānī kī dhun kyuuñ bāġhbāñ ko hai

hamāre paas kyā hai chaar tinke haiñ nasheman ke

hamāre yaar kī qīmat ko kyā tum ne nahīñ dekhā

khaḌe ho sarv shamshād o sanobar! tum jo jiyūñ tan ke

zamāne meñ koī hogā ki bigḌī us kī bantī ho

hamāre khel to saare bigaḌ jaate haiñ ban ban ke

koī ḳhurshīd-sīmā aa rahā hai fātiha paḌhne

zarūrat sham' kī ab kyā sirhāne mere madfan ke

ḳhabar le ab zarā apnī safā.ī qalb kī zāhid

ginegā daaġh kab tak tū mire ālūda dāman ke

zabāñ se kahne se hāsil ki tujh se uns hai mujh ko

samajhtā hai mirā dil ḳhuub ishāre taire chitvan ke

jo vā bhī ho qafas kā dar to ham us se na hoñ bāhar

nahīñ dil meñ hamāre valvale ab sair-e-gulshan ke

garebāñ chaak āñkheñ surḳh barham kākul-e-pechāñ

ye kyā sūrat banā.ī haa.e tum ne ġham meñ dushman ke

marā huuñ ik but-e-ġhārat-gar-e-dīñ kī mohabbat meñ

kafan merā sile tāroñ se zunnār-e-brahman ke

ḳhizāñ aur naġhme shādī ke bahār aa.e to gā lenā

ye din to ai 'anādil haiñ tumhāre shor-o-shevan ke

jo ho bārān-e-rahmat mazra.a-e-aġhyār ke haq meñ

vahī barq-e-ġhazab ho aah haq meñ mere ḳhirman ke

dil-e-nādāñ kī hai kyā asl agar buqrāt bhī hotā

to aatā vo bhī dam meñ us but-e-ayyār-o-pur-fan ke

hasīnān-e-jahāñ ke Dhang duniyā se nirāle haiñ

ki hote haiñ ye dushman dost ke aur dost dushman ke

unheñ hargiz ye dil apnā ki shīshe se bhī nāzuk hai

na deñge ham ki un meñ Dhang abhī tak haiñ laḌakpan ke

ġham-e-duniyā-o-dīñ se ab kahāñ dam bhar kī bhī mohlat

hamārī fāriġh-ul-bālī sudhārī saath bachpan ke

gayā thā raat vā'iz mai-kade meñ vaa'z kahne ko

magar niklā vo koī shai chhupā.e nīche dāman ke

na jāneñ us meñ thī kyā maslahat sannā' be-chūñ kī

dil un sīmīñ-tanoñ ke kyuuñ banā.e sañg-o-āhan ke

agar ġhaflat kā parda duur ho insāñ kī āñkhoñ se

nazar aa.eñ manāzir har jagah vādī-o-aiman ke

taġhāful kaj-adā.ī bevafā.ī āshiq-e-zārī

butoñ ko kyā nahīñ aatā ye haiñ ustād har fan ke

agar mujh se judā hone kī tū ne Thaan hī lī hai

judā.ī Daal pahle darmiyāñ mere sar o tan ke

agar 'ushshāq ke maqsūm meñ thā sadma-e-hijrāñ

banā.e jaate un ke dil bhī yā-rab sañg-o-āhan ke

vo rūThe haiñ to go mushkil nahīñ un kā manā lenā

magar kab tak manā.ūñ ruuTh jaate haiñ vo man man ke

tumhārī maañg ab kyā māñgtī hai naqd-e-dil mujh se

vo hai muddat se qabze meñ tumhārī chashm-e-rahzan ke

'abas is dhun meñ mehr-o-māh khāte phirte haiñ chakkar

ki ho un ko faroġh aage tumhāre rū-e-raushan ke

ġharaz shāyad ye hai 'ranjūr' qabl-az-maut mar jaa.e

chale ho tum jo yuuñ bahr-e-'ayādat aaj ban-Than ke

yaqinan hai koi mah-e-munawwar pichhe chilman ke

ki us ki putliyon se aa raha hai nur chhan chhan ke

qadam kyun-kar na lun but-KHane mein ek ek brahman ke

ki aaya hun yahan main shauq mein ek but ke darshan ke

na kyun aaina wo dekha karen har waqt ban ban ke

zamana hai ye KHud-bini ka din hain un ke joban ke

ye hain saman-e-araish junun mein apne maskan ke

udhar TukDe gareban ke idhar purze hain daman ke

hamare dast-e-wahshat kab hain nichle baiThne wale

uDa lenge na sare tar jab tak jeb-o-daman ke

hamari KHana-virani ki dhun kyun baghban ko hai

hamare pas kya hai chaar tinke hain nasheman ke

hamare yar ki qimat ko kya tum ne nahin dekha

khaDe ho sarw shamshad o sanobar! tum jo jiyun tan ke

zamane mein koi hoga ki bigDi us ki banti ho

hamare khel to sare bigaD jate hain ban ban ke

koi KHurshid-sima aa raha hai fatiha paDhne

zarurat sham' ki ab kya sirhane mere madfan ke

KHabar le ab zara apni safai qalb ki zahid

ginega dagh kab tak tu mere aaluda daman ke

zaban se kahne se hasil ki tujh se uns hai mujh ko

samajhta hai mera dil KHub ishaare taire chitwan ke

jo wa bhi ho qafas ka dar to hum us se na hon bahar

nahin dil mein hamare walwale ab sair-e-gulshan ke

gareban chaak aankhen surKH barham kakul-e-pechan

ye kya surat banai hae tum ne gham mein dushman ke

mara hun ek but-e-ghaarat-gar-e-din ki mohabbat mein

kafan mera sile taron se zunnar-e-brahman ke

KHizan aur naghme shadi ke bahaar aae to ga lena

ye din to ai 'anadil hain tumhaare shor-o-shewan ke

jo ho baran-e-rahmat mazra-e-aghyar ke haq mein

wahi barq-e-ghazab ho aah haq mein mere KHirman ke

dil-e-nadan ki hai kya asl agar buqraat bhi hota

to aata wo bhi dam mein us but-e-ayyar-o-pur-fan ke

hasinan-e-jahan ke Dhang duniya se nirale hain

ki hote hain ye dushman dost ke aur dost dushman ke

unhen hargiz ye dil apna ki shishe se bhi nazuk hai

na denge hum ki un mein Dhang abhi tak hain laDakpan ke

gham-e-duniya-o-din se ab kahan dam bhar ki bhi mohlat

hamari farigh-ul-baali sudhaari sath bachpan ke

gaya tha raat wa'iz mai-kade mein wa'z kahne ko

magar nikla wo koi shai chhupae niche daman ke

na jaanen us mein thi kya maslahat sanna' be-chun ki

dil un simin-tanon ke kyun banae sang-o-ahan ke

agar ghaflat ka parda dur ho insan ki aankhon se

nazar aaen manazir har jagah wadi-o-aiman ke

taghaful kaj-adai bewafai aashiq-e-zari

buton ko kya nahin aata ye hain ustad har fan ke

agar mujh se juda hone ki tu ne Than hi li hai

judai Dal pahle darmiyan mere sar o tan ke

agar 'ushshaq ke maqsum mein tha sadma-e-hijran

banae jate un ke dil bhi ya-rab sang-o-ahan ke

wo ruThe hain to go mushkil nahin un ka mana lena

magar kab tak manaun ruTh jate hain wo man man ke

tumhaari mang ab kya mangti hai naqd-e-dil mujh se

wo hai muddat se qabze mein tumhaari chashm-e-rahzan ke

'abas is dhun mein mehr-o-mah khate phirte hain chakkar

ki ho un ko farogh aage tumhaare ru-e-raushan ke

gharaz shayad ye hai 'ranjur' qabl-az-maut mar jae

chale ho tum jo yun bahr-e-'ayaadat aaj ban-Than ke