ye aalam shauq ka dekha na jae

ye aalam shauq kā dekhā na jaa.e

vo but hai yā ḳhudā dekhā na jaa.e

ye kin nazroñ se tū ne aaj dekhā

ki terā dekhnā dekhā na jaa.e

hamesha ke liye mujh se bichhaḌ jā

ye manzar bār-hā dekhā na jaa.e

ġhalat hai jo sunā par aazmā kar

tujhe ai bevafā dekhā na jaa.e

ye mahrūmī nahīñ pās-e-vafā hai

koī tere sivā dekhā na jaa.e

yahī to āshnā bante haiñ āḳhir

koī nā-āshnā dekhā na jaa.e

ye mere saath kaisī raushnī hai

ki mujh se rāsta dekhā na jaa.e

'farāz' apne sivā hai kaun terā

tujhe tujh se judā dekhā na jaa.e

ye aalam shauq ka dekha na jae

wo but hai ya KHuda dekha na jae

ye kin nazron se tu ne aaj dekha

ki tera dekhna dekha na jae

hamesha ke liye mujh se bichhaD ja

ye manzar bar-ha dekha na jae

ghalat hai jo suna par aazma kar

tujhe ai bewafa dekha na jae

ye mahrumi nahin pas-e-wafa hai

koi tere siwa dekha na jae

yahi to aashna bante hain aaKHir

koi na-ashna dekha na jae

ye mere sath kaisi raushni hai

ki mujh se rasta dekha na jae

'faraaz' apne siwa hai kaun tera

tujhe tujh se juda dekha na jae