ye alag baat ki fursat bhi nahin milti hai

ye alag baat ki fursat bhī nahīñ miltī hai

ḳhud se mil kar hameñ rāhat bhī nahīñ miltī hai

ham to karnā bhī nahīñ chāhte dil kā saudā

aur munāsib hameñ qīmat bhī nahīñ miltī hai

'ishq vo jurm hai is jurm ko karne vaalo

is ke mujrim ko zamānat bhī nahīñ miltī hai

dauḌte bhī nahīñ shohrat ke ham aage pīchhe

aur āsānī se shohrat bhī nahīñ miltī hai

har jagah log mohazzab bhī nahīñ hote haiñ

har jagah dosto 'izzat bhī nahīñ miltī hai

ham ne maanā ki bure aap nahīñ haiñ lekin

aap meñ koī sharāfat bhī nahīñ miltī hai

aish beTe kī kamā.ī se bahū kartī hai

maañ ko ab duudh kī ujrat bhī nahīñ miltī hai

har kisī se nahīñ rakhtā huuñ maiñ rishta 'ālam'

har kisī se ye tabī'at bhī nahīñ miltī hai

ye alag baat ki fursat bhi nahin milti hai

KHud se mil kar hamein rahat bhi nahin milti hai

hum to karna bhi nahin chahte dil ka sauda

aur munasib hamein qimat bhi nahin milti hai

'ishq wo jurm hai is jurm ko karne walo

is ke mujrim ko zamanat bhi nahin milti hai

dauDte bhi nahin shohrat ke hum aage pichhe

aur aasani se shohrat bhi nahin milti hai

har jagah log mohazzab bhi nahin hote hain

har jagah dosto 'izzat bhi nahin milti hai

hum ne mana ki bure aap nahin hain lekin

aap mein koi sharafat bhi nahin milti hai

aish beTe ki kamai se bahu karti hai

man ko ab dudh ki ujrat bhi nahin milti hai

har kisi se nahin rakhta hun main rishta 'alam'

har kisi se ye tabi'at bhi nahin milti hai