ye aur baat ki ye sehr besh-o-kam pe chala

ye aur baat ki ye sehr besh-o-kam pe chalā

siyāh-rāt kā jaadū magar na ham pe chalā

udhar se pahle bhī kuchh sarfarosh guzāre the

rah-e-talab meñ nishān-e-qadam qadam pe chalā

ye tā.irān-e-chaman kā nasīb kyā kahiye

vo tiir un ke liye vaqf hai jo kam pe chalā

ḳhudā ḳhudā ke ishāre pe lauT lauT gayā

taḌap taḌap ke tarīq-e-sanam sanam pe chalā

kabhī ḳhudā kī parastish kabhī sanā-e-butāñ

rah-e-arab pe kabhī jāda-e-ajam pe chalā

asīr-e-dām na hogā mirā dil-e-āzād

kisī kā hukm kabhī mauj-e-yam-ba-yam pe chalā

tujhe bhī dekh liyā ham ne o ḳhudā-e-ajal

ki terā zor chalā bhī to ahl-e-ġham pe chalā

ye naqsh-e-pā haiñ ki zanjīr-e-mauj-e-ḳhūñ yaaro

ye kaun turfa-javāñ jāda-e-sitam pe chalā

lab-o-nigāh pe mohreñ lagī rahīñ 'tāhir'

kisī kā zor na lekin mire qalam pe chalā

ye aur baat ki ye sehr besh-o-kam pe chala

siyah-raat ka jadu magar na hum pe chala

udhar se pahle bhi kuchh sarfarosh guzare the

rah-e-talab mein nishan-e-qadam qadam pe chala

ye tairan-e-chaman ka nasib kya kahiye

wo tir un ke liye waqf hai jo kam pe chala

KHuda KHuda ke ishaare pe lauT lauT gaya

taDap taDap ke tariq-e-sanam sanam pe chala

kabhi KHuda ki parastish kabhi sana-e-butan

rah-e-arab pe kabhi jada-e-ajam pe chala

asir-e-dam na hoga mera dil-e-azad

kisi ka hukm kabhi mauj-e-yam-ba-yam pe chala

tujhe bhi dekh liya hum ne o KHuda-e-ajal

ki tera zor chala bhi to ahl-e-gham pe chala

ye naqsh-e-pa hain ki zanjir-e-mauj-e-KHun yaro

ye kaun turfa-jawan jada-e-sitam pe chala

lab-o-nigah pe mohren lagi rahin 'tahir'

kisi ka zor na lekin mere qalam pe chala