ye az-KHud-raftagi bilkul nai thi

ye az-ḳhud-raftagī bilkul na.ī thī

ki tafsīr-e-hadīs-e-dil na.ī thī

sarāboñ kī sarisht-e-nā-rasā.ī

tamannā ke liye manzil na.ī thī

vo pahle bhī junūñ se āshnā the

ye garmī ḳhuun meñ shāmil na.ī thī

nayā thā dard ke rishtoñ se naata

na.ī koñpal thī āb-o-gil na.ī thī

kināre mauj se milte rahe the

magar ab mastī-e-sāhil na.ī thī

na.e jalve farozāñ is qadar the

nigāhoñ ke liye mushkil na.ī thī

vafā kī raah meñ har do qadam par

kahīñ dīvār ik haa.el na.ī thī

shikasta par the ḳhushiyoñ ke anādil

dukhoñ ke pair meñ paa.el na.ī thī

añdhere ḳhauf jis se khā rahe the

tamannāoñ kī vo jhil-mil na.ī thī

ye az-KHud-raftagi bilkul nai thi

ki tafsir-e-hadis-e-dil nai thi

sarabon ki sarisht-e-na-rasai

tamanna ke liye manzil nai thi

wo pahle bhi junun se aashna the

ye garmi KHun mein shamil nai thi

naya tha dard ke rishton se nata

nai konpal thi aab-o-gil nai thi

kinare mauj se milte rahe the

magar ab masti-e-sahil nai thi

nae jalwe farozan is qadar the

nigahon ke liye mushkil nai thi

wafa ki rah mein har do qadam par

kahin diwar ek hael nai thi

shikasta par the KHushiyon ke anadil

dukhon ke pair mein pael nai thi

andhere KHauf jis se kha rahe the

tamannaon ki wo jhil-mil nai thi