ye baat to nahin hai ki main kam-sawad tha

ye baat to nahīñ hai ki maiñ kam-savād thā

TuuTā huuñ is binā pe ki maiñ kaj-nihād thā

ilzām apnī maut kā mausam pe kyuuñ dharūñ

mere badan meñ mere lahū kā fasād thā

ab maiñ bhī jal ke raakh huuñ mere jahāz bhī

kal merā naam tāriq-e-ibn-e-ziyād thā

īmāñ bhī laaj rakh na sakā mere jhuuT kī

apne ḳhudā pe kitnā mujhe e'timād thā

gahre samundaroñ meñ bhī patthar mile mujhe

thā maiñ guhar-shanās magar sañg-zād thā

tū bādbāñ-darīda safīne kā nāḳhudā

aur qulzum-e-sarāb kā maiñ sindbād thā

ab huuñ zabāñ burīda to ye soch kar huuñ chup

ye bhī suḳhan-shanās kā andāz-dād thā

ye baat to nahin hai ki main kam-sawad tha

TuTa hun is bina pe ki main kaj-nihad tha

ilzam apni maut ka mausam pe kyun dharun

mere badan mein mere lahu ka fasad tha

ab main bhi jal ke rakh hun mere jahaz bhi

kal mera nam tariq-e-ibn-e-ziyaad tha

iman bhi laj rakh na saka mere jhuT ki

apne KHuda pe kitna mujhe e'timad tha

gahre samundaron mein bhi patthar mile mujhe

tha main guhar-shanas magar sang-zad tha

tu baadban-darida safine ka naKHuda

aur qulzum-e-sarab ka main sindbaad tha

ab hun zaban burida to ye soch kar hun chup

ye bhi suKHan-shanas ka andaz-dad tha