ye baaton hi baaton mein baaten badalna

ye bātoñ hī bātoñ meñ bāteñ badalnā

koī tum se sīkhe ye āñkheñ badalnā

ham aaseb ke Dar se ghar kyuuñ badal leñ

parindoñ pe jachtā hai shāḳheñ badalnā

kuchh apnā bhī kah lo yuuñ kab tak chalegā

radīfeñ uchaknā zamīneñ badalnā

vahī ġham se aarī haiñ kār-e-jahāñ meñ

jinheñ ḳhuub aatā hai rāheñ badalnā

ye jiinā bhī shatranj hī ne sikhāyā

ki chāloñ ke lagne pe chāleñ badalnā

rivāyat rahī hai yahī fī zamāna

nazariye badalnā kitābeñ badalnā

ye tujh se hī sīkhā hai jān-e-tamannā

zarā sī udāsī meñ bāñheñ badalnā

ye baaton hi baaton mein baaten badalna

koi tum se sikhe ye aankhen badalna

hum aaseb ke Dar se ghar kyun badal len

parindon pe jachta hai shaKHen badalna

kuchh apna bhi kah lo yun kab tak chalega

radifen uchakna zaminen badalna

wahi gham se aari hain kar-e-jahan mein

jinhen KHub aata hai rahen badalna

ye jina bhi shatranj hi ne sikhaya

ki chaalon ke lagne pe chaalen badalna

riwayat rahi hai yahi fi zamana

nazariye badalna kitaben badalna

ye tujh se hi sikha hai jaan-e-tamanna

zara si udasi mein banhen badalna