ye bahut aasan hai sab par tabsira karte raho

ye bahut āsāñ hai sab par tabsirā karte raho

baat to jab hai ki apnā sāmnā karte raho

har-nafas par zindagī kā haq adā karte raho

roz marnā hai to jiine kī duā karte raho

har-qadam par manzileñ āvāz deñgī ḳhud tumheñ

shart ye hai apne hone kā patā karte raho

kyā zarūrī hai na maano dil kī koī baat bhī

achchhā lagtā hai kabhī dil kā kahā karte raho

hai yahī rasm-e-mohabbat to chalo yuuñ hī sahī

ham vafā karte raheñ aur tum jafā karte raho

āte-jāte mausamoñ kā rang nazroñ meñ rahe

kaun manzar kis tarah hai tajziya karte raho

phir yazīd-e-asr ke ab haath meñ talvār hai

phir husain-ibn-e-alī kā tazkira karte raho

ye bahut aasan hai sab par tabsira karte raho

baat to jab hai ki apna samna karte raho

har-nafas par zindagi ka haq ada karte raho

roz marna hai to jine ki dua karte raho

har-qadam par manzilen aawaz dengi KHud tumhein

shart ye hai apne hone ka pata karte raho

kya zaruri hai na mano dil ki koi baat bhi

achchha lagta hai kabhi dil ka kaha karte raho

hai yahi rasm-e-mohabbat to chalo yun hi sahi

hum wafa karte rahen aur tum jafa karte raho

aate-jate mausamon ka rang nazron mein rahe

kaun manzar kis tarah hai tajziya karte raho

phir yazid-e-asr ke ab hath mein talwar hai

phir husain-ibn-e-ali ka tazkira karte raho