ye bala mere sar chaDhi hi nahin

ye balā mere sar chaḌhī hī nahīñ

maiñ ne kachche ghaḌe kī pī hī nahīñ

aag aisī kabhī lagī hī nahīñ

ki lagī dil kī phir bujhī hī nahīñ

pī bhī yuuñ jaise maiñ ne pī hī nahīñ

muñh se mere kabhī lagī hī nahīñ

dil na jab tak huā sharīk-e-hinā

mehñdī un kī kabhī pisī hī nahīñ

shikan-e-zulf halqa-e-gesū

beḌiyāñ bhī haiñ hathkaḌī hī nahīñ

kaun letā balā.eñ paikāñ kī

aarzū koī dil meñ thī hī nahīñ

kis qadar huuñ banā havā meñ bhī

jaise maiñ ne sharāb pī hī nahīñ

dil meñ kyā aa.e kyā chale dil se

tum ne chuTkī to koī lī hī nahīñ

sub.h kā jhuTpuTā thā shaam na thī

vasl kī raat raat thī hī nahīñ

kyuuñ sune shaiḳh qulqul-e-mīnā

us ne aisī kabhī sunī hī nahīñ

aa.e aane ko fasl-e-gul sau baar

mere dil kī kalī khilī hī nahīñ

haa.e sabze meñ vo siyah botal

kabhī aisī ghaTā uThī hī nahīñ

laag bhī dil se hai lagāv ke saath

dushmanī bhī hai dostī hī nahīñ

muñh lagānā mirā ik aafat thā

ḳhum meñ vo chiiz jaise thī hī nahīñ

bazm-ārā-e-hashr ke sadqe

mahfil aisī kabhī jamī hī nahīñ

kuchh maze meñ ham aa ga.e aise

tauba piine se ham ne kī hī nahīñ

koī nā-ḳhush 'riyāz' se kyuuñ ho

us ravish kā vo aadmī hī nahīñ

ye bala mere sar chaDhi hi nahin

main ne kachche ghaDe ki pi hi nahin

aag aisi kabhi lagi hi nahin

ki lagi dil ki phir bujhi hi nahin

pi bhi yun jaise main ne pi hi nahin

munh se mere kabhi lagi hi nahin

dil na jab tak hua sharik-e-hina

mehndi un ki kabhi pisi hi nahin

shikan-e-zulf halqa-e-gesu

beDiyan bhi hain hathkaDi hi nahin

kaun leta balaen paikan ki

aarzu koi dil mein thi hi nahin

kis qadar hun bana hawa mein bhi

jaise main ne sharab pi hi nahin

dil mein kya aae kya chale dil se

tum ne chuTki to koi li hi nahin

subh ka jhuTpuTa tha sham na thi

wasl ki raat raat thi hi nahin

kyun sune shaiKH qulqul-e-mina

us ne aisi kabhi suni hi nahin

aae aane ko fasl-e-gul sau bar

mere dil ki kali khili hi nahin

hae sabze mein wo siyah botal

kabhi aisi ghaTa uThi hi nahin

lag bhi dil se hai lagaw ke sath

dushmani bhi hai dosti hi nahin

munh lagana mera ek aafat tha

KHum mein wo chiz jaise thi hi nahin

bazm-ara-e-hashr ke sadqe

mahfil aisi kabhi jami hi nahin

kuchh maze mein hum aa gae aise

tauba pine se hum ne ki hi nahin

koi na-KHush 'riyaz' se kyun ho

us rawish ka wo aadmi hi nahin