ye bastiyan hain ki maqtal dua kiye jaen

ye bastiyāñ haiñ ki maqtal duā kiye jaa.eñ

duā ke din haiñ musalsal duā kiye jaa.eñ

koī fuġhāñ koī naala koī bukā koī bain

khulegā bāb-e-muqaffal duā kiye jaa.eñ

ye iztirāb ye lambā safar ye tanhā.ī

ye raat aur ye jañgal duā kiye jaa.eñ

bahāl ho ke rahegī fazā-e-ḳhitta-e-ḳhair

ye habs hogā mo.attal duā kiye jaa.eñ

guzishtagān-e-mohabbat ke ḳhvāb kī saugand

vo ḳhvāb hogā mukammal duā kiye jaa.eñ

havā.e sarkash o saffāk ke muqābil bhī

ye dil bujheñge na mish.al duā kiye jaa.eñ

ġhubār uḌātī jhulastī huī zamīnoñ par

umañD ke ā.eñge bādal duā kiye jaa.eñ

qubūl honā muqaddar hai harf-e-ḳhālis kā

har ek aan har ik pal duā kiye jaa.eñ

ye bastiyan hain ki maqtal dua kiye jaen

dua ke din hain musalsal dua kiye jaen

koi fughan koi nala koi buka koi bain

khulega bab-e-muqaffal dua kiye jaen

ye iztirab ye lamba safar ye tanhai

ye raat aur ye jangal dua kiye jaen

bahaal ho ke rahegi faza-e-KHitta-e-KHair

ye habs hoga moattal dua kiye jaen

guzishtagan-e-mohabbat ke KHwab ki saugand

wo KHwab hoga mukammal dua kiye jaen

hawae sarkash o saffak ke muqabil bhi

ye dil bujhenge na mishal dua kiye jaen

ghubar uDati jhulasti hui zaminon par

umanD ke aaenge baadal dua kiye jaen

qubul hona muqaddar hai harf-e-KHalis ka

har ek aan har ek pal dua kiye jaen