ye bhi hai koi baat ki dil bad-guman na ho

ye bhī hai koī baat ki dil bad-gumāñ na ho

merā to ho adū kā magar imtihāñ na ho

tere sivā jo dil meñ koī jān-e-jāñ na ho

phir ye makān kaahe ko ho lā-makāñ na ho

ai zabt-e-dard-e-ishq kisī par ayaañ na ho

dil hī meñ aah kar ki koī bad-gumāñ na ho

shart-e-vafā hai shikva-e-jānāñ bayāñ na ho

mahshar ko bā-ḳhudā mire muñh meñ zabāñ na ho

gulchīñ ho shaad ḳhush raheñ sayyād-o-bāġhbāñ

gulshan meñ gar nahīñ hai mirā āshiyāñ na ho

kyoñ ho butoñ ke qaul kā har baar e.atibār

dhokā na khā.eñ ham jo ḳhudā darmiyāñ na ho

us barq-e-fitna-ḳhū kī jo chāleñ na hoñ sharīk

is āb-o-tāb kā sitam-e-āsmāñ na ho

merā ḳhudā-e-pāk to hai mehrbān-e-hāl

kyā fikr hai vo but jo nahīñ mehrbāñ na ho

ā.īna ham dikhāte haiñ o bad-gumāñ tujhe

dekheñ to apne husn pe tujh ko gumāñ na ho

aane de roz-e-hashr zarā ai shab-e-firāq

aisī jagah talāsh karūñ tū jahāñ na ho

duniyā meñ us ke jor se mumkin nahīñ najāt

aisī zamīñ kahāñ hai jahāñ āsmāñ na ho

be-fasl kyoñ falak pe ghaTā.eñ uThīñ haiñ aaj

bachnā ye merī aah kā zālim dhuāñ na ho

jo kuchh ki pūchhnā hai yahīñ mujh se pūchh le

yā-rab butoñ ke ishq kī pursish vahāñ na ho

maiñ apne dil meñ rakkhūñgā ġhairoñ ko qadr kyā

mujh par lagā ki tiir koī rā.egāñ na ho

hikmat ḳhudā kī thī ki ye khaTkā lagā diyā

phūle na gul samā.eñ jo ḳhauf-e-ḳhizāñ na ho

bandish ye shā.iroñ kī ba.īd-az-qayās hai

mumkin nahīñ kisī ke kamar yā dahāñ na ho

tirchhī na ho nigāh to bismil na ho koī

sīdhā na jaa.e tiir jo TeḌhī kamāñ na ho

allāh re nigāh-e-sanam kī safā.iyāñ

chaurang kaaT jaa.e magar kuchh nishāñ na ho

TūTeñ na yuuñ kisī pe sitam par sitam kabhī

'kaifī' jo āsmāñ pe koī āsmāñ na ho

ye bhi hai koi baat ki dil bad-guman na ho

mera to ho adu ka magar imtihan na ho

tere siwa jo dil mein koi jaan-e-jaan na ho

phir ye makan kahe ko ho la-makan na ho

ai zabt-e-dard-e-ishq kisi par ayan na ho

dil hi mein aah kar ki koi bad-guman na ho

shart-e-wafa hai shikwa-e-jaanan bayan na ho

mahshar ko ba-KHuda mere munh mein zaban na ho

gulchin ho shad KHush rahen sayyaad-o-baghban

gulshan mein gar nahin hai mera aashiyan na ho

kyon ho buton ke qaul ka har bar eatibar

dhoka na khaen hum jo KHuda darmiyan na ho

us barq-e-fitna-KHu ki jo chaalen na hon sharik

is aab-o-tab ka sitam-e-asman na ho

mera KHuda-e-pak to hai mehrban-e-haal

kya fikr hai wo but jo nahin mehrban na ho

aaina hum dikhate hain o bad-guman tujhe

dekhen to apne husn pe tujh ko guman na ho

aane de roz-e-hashr zara ai shab-e-firaq

aisi jagah talash karun tu jahan na ho

duniya mein us ke jor se mumkin nahin najat

aisi zamin kahan hai jahan aasman na ho

be-fasl kyon falak pe ghaTaen uThin hain aaj

bachna ye meri aah ka zalim dhuan na ho

jo kuchh ki puchhna hai yahin mujh se puchh le

ya-rab buton ke ishq ki pursish wahan na ho

main apne dil mein rakkhunga ghairon ko qadr kya

mujh par laga ki tir koi raegan na ho

hikmat KHuda ki thi ki ye khaTka laga diya

phule na gul samaen jo KHauf-e-KHizan na ho

bandish ye shairon ki baid-az-qayas hai

mumkin nahin kisi ke kamar ya dahan na ho

tirchhi na ho nigah to bismil na ho koi

sidha na jae tir jo TeDhi kaman na ho

allah re nigah-e-sanam ki safaiyan

chaurang kaT jae magar kuchh nishan na ho

TuTen na yun kisi pe sitam par sitam kabhi

'kaifi' jo aasman pe koi aasman na ho