ye bhi mumkin hai ki aankhen hon tamasha hi na ho

ye bhī mumkin hai ki āñkheñ hoñ tamāshā hī na ho

raas aane lage ham ko to ye duniyā hī na ho

kahīñ nikle koī andāza hamārā bhī ġhalat

jānte haiñ use jaisā kahīñ vaisā hī na ho

ho kisī tarha se maḳhsūs hamāre hī liye

yaanī jitnā nazar aatā hai vo utnā hī na ho

TakTakī bāñdh ke maiñ dekh rahā huuñ jis ko

ye bhī ho saktā hai vo sāmne baiThā hī na ho

vo koī aur ho jo saath kisī aur ke hai

asl meñ to vo abhī lauT ke aayā hī na ho

ḳhvāb-dar-ḳhvāb chalā kartā hai āñkhoñ meñ jo shaḳhs

DhūñDne nikleñ use aur kahīñ rahtā hī na ho

chamak uTThā ho abhī rū-e-bayābāñ ik dam

aur ye nazzāra kisī aur ne dekhā hī na ho

kaifiyat hī koī paanī ne badal lī ho kahīñ

ham jise dasht samajhte haiñ vo dariyā hī na ho

mas.ala itnā bhī āsān nahīñ hai ki 'zafar'

apne nazdīk jo sīdhā hai vo ulTā hī na ho

ye bhi mumkin hai ki aankhen hon tamasha hi na ho

ras aane lage hum ko to ye duniya hi na ho

kahin nikle koi andaza hamara bhi ghalat

jaante hain use jaisa kahin waisa hi na ho

ho kisi tarha se maKHsus hamare hi liye

yani jitna nazar aata hai wo utna hi na ho

TakTaki bandh ke main dekh raha hun jis ko

ye bhi ho sakta hai wo samne baiTha hi na ho

wo koi aur ho jo sath kisi aur ke hai

asl mein to wo abhi lauT ke aaya hi na ho

KHwab-dar-KHwab chala karta hai aankhon mein jo shaKHs

DhunDne niklen use aur kahin rahta hi na ho

chamak uTTha ho abhi ru-e-bayaban ek dam

aur ye nazzara kisi aur ne dekha hi na ho

kaifiyat hi koi pani ne badal li ho kahin

hum jise dasht samajhte hain wo dariya hi na ho

masala itna bhi aasan nahin hai ki 'zafar'

apne nazdik jo sidha hai wo ulTa hi na ho